Sfuei Mensîl Furlan Indipendent
Archivi de Patrie

La justizie e je propit compagne par ducj

Barbara Cinausero

Ae fin o sin inte stesse barcje cui nestris vicins, e almancul par une volte no scugnìn lâ plets par vie di un probleme cronic che nus lambiche dome nô: di fat ancje la justizie austriache si cjate sul ôr di un repeton. In Austrie i dipendents dai tribunâi si stan puartant il lavôr a cjase: al è cussì che il tribunâl di Clanfurt al à pensât di disberdeâ il glimuç des pratichis ingrumadis, cirint di platâ i gredeis che a son vignûts fûr par colpe de mancjance di personâl.

◆ Juste in chel tribunâl, tal Avrîl dal 2018, e jere stade fate une proteste mai viodude prime. Plui di cent judiçs di dute la Austrie, cui procuradôrs de Republiche, a vevin protestât cuintri chê che a vevin clamât “economie de justizie fin ae muart”, metint in vuaite sul fat che il stât di dirit al jere in pericul. A protestavin cuintri de sopression dai puescj di judiç. In prime rie a jerin sentâts i rapresentants de justizie di nivel di plui alt cun in man cartei di proteste, mostrant une situazion che no si jere mai viodude.

◆ Daspò doi agns, il ministri de justizie dal guvier prin, Clemens Jabloner, al dîs che “la justizie e je daûr a patî une muart cidine”. Si sbroche cussì, ma al marche ancje di no volê piturâ une suaze masse nere. Al lance però un alarmi, par vie che ai tribunâi ur mancjin propit chei colaboradôrs che “ju mandin indevant”: i lavoradôrs des cancelariis e il personâl di segretarie. La presidente dal ordin dai judiçs e chel de cjamare austriache dai avocats a son dacuardi cul ministri sul fat che no si pues lâ indenant cussì, e a declarin che si varès di cjapâ in man la cuistion e di tirâ fûr bêçs e personâl, massime pai tribunâi regjonâi che aromai a son al imbast.

◆ Cumò la gnove ministre Alma Zadic, 35 agns, e cîr di stropâ la buse, metint adun plans di emergjence che a previodin di dâ prioritât ai procediments in pîts e di sierâ par cualchi timp cualchi sezion. Stant ae stampe, a saressin fintremai colaboradôrs che a davuelzin lavôr straordenari sore nuie, pûr di mantignî un minim di operativitât.

◆ La SPÖ (ae oposizion) i da la colpe al guvier Kurz, che al varès mandât la justizie in ruvine. Se no si puedin mandâ indevant i procediments, se lis cancelariis no puedin publicâ i judicâts par vie de mancjance di personâl, prin o dopo i efiets si fasaran sintî ancje su la int: “Cui che al sparagne su la justizie, al met in pericul il stât di dirit, e cui che si ribele al stât di dirit al semene violence” a disin i socialdemocratics. Cundiplui il guvier al marche la dibisugne di un control dal lavôr di judiçs e procuradôrs di bande di une autoritât esterne, ma – e ancje in chest o podìn viodi someancis cu la nestre situazion – la oposizion e intraviôt il tentatîf di imbrenâ la lôr libertât.

◆ In Austrie a son 115 tribunâi distretuâi e cuatri superiôrs che a scrutinin sù par jù 2,8 milions di pratichis ad an, cuntune durade tant plui basse de medie dai stâts de UE e cun eficience e ûs dai implants informatics une vore plui alts. A figurin ancje tant che lûcs di formazion cetant impuartants: in dì di vuê a àn 350 puescj di tirocini par assistents aministratîfs (cun specializazion in informatiche) e plui di 100 praticants pes professions di avocats, nodârs e judiçs.

◆ Duncje e je clare la consecuence dramatiche di chest probleme su dute la vite dal Stât, che cu lis ultimis elezions al contave di cjatâ la sô stabilitât, no dome politiche, ma cumò al scugnarà frontâ come ducj chei altris i dams di pandemie che no sparagne nissun. ❚

 

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +