✽✽ Cualchi zornade indaûr, dopo vê presentât la ativitât de ‘Patrie’ e la publicazion “Fûc su Gurize”, il gnûf libri de nestre golaine “La machine dal timp”, a un cors di furlan a Ruvigne, adun cun Diego si sin fermâts par scambiâ cualchi opinion cul docent Giorgio Pascoli.
✽✽ E propit lui nus veve contât un episodi che al merete rimarcât. La protagoniste e je une siore dal Est, plurilaureade tal so Paîs, ma che in Italie e fâs la assistente di famee. Ben, chê femine si moveve ogni setemane, te sô zornade libare, di Cjampfuarmit a San Denêl par frecuentâ un cors de Filologjiche par imparâ il furlan. Parcè lu fasevial? La sô rispueste e je stade semplice: “Cemût puedio stâ dongje di une persone anziane se no cognòs la lenghe che e dopre par esprimi i siei sintiments, lis sôs dibisugnis?”.
✽✽ Mi son vignudis iniment lis desenis di personis forestis che aromai a lavorin tai nestris ospedâi e tai servizis. Mi soi domandât trops di lôr che a mostrin la stesse disponibilitât di cheste femine. Clâr che no ur doi colpe a lôr, ma pluitost mi domandi cualis iniziativis che lis nestris istituzions a àn metût in cjamp par anulâ cheste distance obietive.
✽✽ Al è un probleme ancjemò plui urgjent denant des cifris dramatichis de emigrazion dai zovins de nestre regjon. Lant indenant cun chest pas, tai prossims agns podarìno inmò fevelâ di Friûl o descrivarìno une comunitât di personis simpri plui vecje, cence fîs e duncje cence avignî?
✽✽ Eutanasie di un popul? Espression teribile che e pues deventâ realtât tragjiche se no si metin in vore rimiedis che a funzionin e soredut svelts, domandantsi in maniere grame se al sedi ancjemò timp par fâ alc.
✽✽ Il teme de imigrazion e de integrazion di chestis personis, inte nestre vite e inte nestre storie, al reste la ultime opzion che si pues praticâ. Integrâ nol vûl dî anulâ lis specialitâts des dôs parts, invezit al è un procès di cressite comune, di une vision dal futûr che al pues metilis in comun.
✽✽ Par chest doman metût a miezis a coventin sieltis coragjosis. Di bande nestre a son subietivis, te convinzion che no sedin altris stradis di podê fâ, e obietivis par che chestis cundizions si realizin inte realtât di ogni dì, in ogni setôr e profession.
✽✽ Episodis di buine volontât no son avonde, ma a coventin rispuestis di sisteme. ❚
