TV FRIÛL E CJANÇONS , LA VUIDE AI PROGRAMS. Friûlyager – ai confins da la furlanitât

Al è scomençât il 2012 e dut il mont si domande se al sarà pardabon l’ultin an de umanitât. E par rispuindi a dutis lis domandis dai furlans (soredut a chês che i furlans no àn minimementri intenzion di fâsi) par television al è “Friûlyager – ai confins da la furlanetât”, cun Roberto Giacobbo, un program di servizi public (ae fin de pontade, visaitsi di tirâ la cjadene).
Te prossime pontade di Friûlyager:
•    I Maya e la profezie de fin dal mont: dacuardi che o vin di murî ducj, ma ce fin farano lis nestris cjasis? E dut ce che o vin sparagnât?
•    Une scuvierte sensazionâl: par fâ sù lis piramidis di Egjit, i faraons àn clamât sclâfs furlans: nissun altri al varès lavorât cussì tant cence lamentâsi.
•    Il câs incredibil di un om cuntune dople personalitât: triestin di dì, furlan di gnot. Nissun al è ancjemò rivât a intervistâlu: di gnot al à masse ce fâ, di dì al è simpri ator.
•    I cavalîrs Templârs e il Sacri Graal: ise vere che al jere plen di Tocai?
•    Une profezie scure e fevele di un tsunami tal Tiliment, ma fat dut di “Gote di Cjargne” ferbint.
•    Disvelât il misteri dal riduçâ de Gjoconde: e veve a pene viodût un triestin che al cjapave une multe.
•    Segnalade une presince misteriose tai boscs de val dal Vaiont: cui isal? Un yeti o Mauro Corona?
•    Lis lagnancis di un om cu la cjase infestade dai spirts: “Se a àn voie di stâ, che a stedin, ma almancul che mi judin a lavorâ tal ort!”.
•    Parcè Leonardo da Vinci scrivevial devantdaûr? Jerial un mût par taponâ i conts o il risultât di une sere te ostarie?
•    I cerclis tal forment, la int e vûl savê la veretât: ce raze di tratôrs àno i aliens? Si podìno doprâ ancje te blave?
Friûlyager. Dutis lis setemanis, un apontament cun ducj i misteris che i furlans no àn mai contât a di nissun, parcè che a àn alc di miôr ce fâ. ■
BETE DI SPERE