Sfuei Mensîl Furlan Indipendent
Archivi de Patrie

IL FERÂL. Vescul in Friûl

............

Il prin dal an al è mancjâ il vescul bons Fredo Battisti, nus pâr just che ancje la Patrie e ricuardi cheste persone che culì in Friûl e veve fat un biel toc di strade. Di fat al veve direzude la glesie di Udin dal 1973 al 2000: 27 agns di pontificât, no son pôcs. Oltri dut un trat di storie vonde dramatiche e movimentade par tantis resons: vicendis dal predecessôr Zaffonato, post-concili, taramot, gambiaments sociâi, di custum… Lis aial induvinadis dutis? Lis aial sbaliadis dutis? Sigûr che nissun te vite no les imbroche dutis justis, al sarès un diu, ma nancje no les falìs dutis, al sarès une disgracie uniche. Cussì e je par ducj i mortâi!
Par preparâ il Ferâl, o sin lâts a sgrafâ tai scrits di pre Antoni. E come che al jere tal so naturâl e stant che cul vescul al à vût moments di tension che ducj sa, cence scuindi nuie, cu la solite francjece, Beline al scrîf une Olme pe Vite Catoliche, che però no à cjatât udience tal diretôr di chê volte. Di fat pre Antoni al note sot dal articul preparât ce che il diretôr i veve dit: “al è biel e vêr e duncje no si po’ publicâlu”. Lu riproponìn pensant al vecjo dit di Ammonio te Vite di Aristotele “Amicus Plato, sed magis amica veritas”.
pre Roman Michelotti
Domenie 23 di Novembar la glesie di Udin e celebre lis gnocis di aur di predi e chês di arint di episcopât dal vescul Fredo Battisti. Une raritât te nestre glesie, capitade dome a Emanuel Lodi (1819-1845) e Josef Nogara (1928-1955), che si veve pôre che si fos dismenteât di murî.
Invezit di unîmi al coro laudatîf, che mi costarès masse e su la mê bocje al crearès suspiet, o preferìs partecipâ al aveniment cuntune riflession. Personâl, come simpri.
Cuant che dal 1973 al è rivât chenti, Battisti al à cjatade une diocesi in crisi par tantis resons. Si sintive la dibisugne di voltâ pagjine. E il so prin impat al è stât une vore positîf. E jere la prime volte che si sintive umanitât tes peraulis di un vescul. Di chi la fiducie e la sperance.
E je cunvinzion gjenerâl che pai vescui che a rivin a Udin (simpri regolarmentri forescj) la crôs plui grande a son i predis furlans. Une acuse che si podarès benon ribaltâle. Ma cuant che un predessam al sopuarte un Berengo che al zuiave cu lis pipinis, un Rossi prepotent e ultranazionalist, un Nogara grîs e fassist, un Zaffonato cul cantîr simpri viert e la casse simpri a sec, no puedin dî che o sin anarchics. Magari! O sin ancje masse ubidients e tolerants. Il mâl al è che, a furlan vie, o rugnìn tal fogolâr de canoniche.
Battisti al è vude fiducie e ancje ocasions straordenariis par un vescul: la semblee dai predis cui problemis eclesiâi, il taramot cui problemis de ricostruzion matereâl e spirtuâl, la peculiaritât culturâl e plurilenghistiche, la secolarizazion. Ce volevial di plui, come stimui e oportunitâts?
No mi sint di fâ un consuntîf. Prin di dut parcè che al è simpri dificil e po parcè che al è ancjemò chi e al à simpri timp di miorâ e colmâ ce che nol à rivât a fâ.
I va dât merit di vê capît i problemis, soredut chel culturâl. In chest Battisti al è un câs unic, te storie de diocesi e tes diocesis stessis de regjon. Parcè che l’om nol è stupit. Chei di Rome no fasaran mai un vescul stupit, parcè che dopo a àn di tignîsal cun ducj i riscjis mortâi. Lu fasin però ubidient, un fedêl esecutôr, seont l’etimologjie di episcopos come “ispetôr”, impen de categorie evangjeliche di “bon pastôr”. Bon ancje di dî di no par amôr dal so trop.
Battisti al à clopât propit in chest. Lucit tal capî il probleme, nol à vude la fuarce e la coerence tal metilu in vore fin dapît, riscjant pal so popul ancje di finîle plevan di Subît, come che profeticamentri i veve augurât pre Pieri Tomasino te semblee dal 1975. Cussì al à finît cul scontentâ catolics e luterans.
Causis? Il caratar personâl, il fat di vignî dal Venit preot e fufignot, il vê stât par 25 agns sot di un vescul-frari. Ma il mâl al è tal mani. I vescui a son simpri mancul libars di dî ce che a pensin e di sielzi in maniere autonome e evangjeliche. Jo no larai mai in rotis cu la mê int di Visepente par parâ il vescul. Il vescul nol larà mai in rotis cun Rome par parâ la sô int. No tes eresiis, ma tal bon dirit.
Jessint cussì la fabriche, Battisti al è il miôr dai piês e a mi mi va ancje ben, ancje se no lu disarai mai parcè che di un che al à capît si pò pratindi di plui.
Auguris? Di vê cui predis un rapuart sclet e di amicizie, di scoltâ chei che lu judin cu la critiche plui di chei che lu lassin sbaliâ cu la adulazion e la omertât, di no sielzi int distudade o stupide par no vê rognis, di no vê pôre di vê coragjo. Di doprâ i ultins agns che i restin no par tirâsi in bande come il rai, ma par dâ sot cun plui sgrimie, savint che nol riscje nuie. Di imparâ dal bon ladron a sigurâsi almancul cumò un puest tal ream di Diu e tal libri de sô e nestre glesie e dal so e nestri popul. ■
pre ANTONI BELINE
(Olme preparade ai 17.11.97, publicade su Cirint lis olmis di Diu, n. 4 pagj. 121)

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +