TERITORIS – Toponomastiche, identitât e politichis linguistichis

Trê dîs di cunvignis, dai 17 ai 19 di Novembar, organizâts dal “Gruppo di Studio sulle Politiche Linguistiche” (GSPL) de “Società di Linguistica Italiana” (SLI) adun cu la Societât Filologjiche Furlane e la poie de Regjon autonome Friûl – V.J., par fevelâ di un teme internazionâl che nus viôt di dongje: “Nons, Lûcs, Identitâts.Toponomastiche e Politichis Lenghistichis”. Il fin al è chel di un scambi di esperiencis e opinions in merit a lis politichis linguistichis in materie di toponomastiche, gjeografie e dirit. Studiôs di diviers setôrs dissiplinârs (linguistiche, gjeografie, dirit, siencis politichis e economichis) a àn vût maniere di presentâ e scambiâsi esperiencis, fâ confronts tra paîs e regjons diviersis e tra i diviers ambits di studi.
TANTIS LENGHIS DISCOGNOSSUDIS_ Cul professôr Franco Finco, coordenadôr dal event, o vin tirât un pôc lis sumis su chel che al è stât dibatût dilunc dai incuintris, cjalant soredut a realtâts positivis che nus vegnin dal forest; ai plui discognossude, par esempli, e je la situazion de minorance todescje in Polonie che, daspò de colade dal regjim comunist, e je stade ricognossude in maniere uficiâl dal stât polac. In dì di vuê, intai comuns cun minoranciis todescjis, al è ricognossût il bilenghisim e la lenghe e je sotponude a tutele.
Un altri esempli al è chel de minorance casciube (lenghe fevelade tal Voivodât de Pomeranie in teritori polac), ricognossude come lenghe e metude sot tutele tai ultins agns, cun scuelis dulà che si le studie, cartelonistiche bilengâl e mieçs di comunicazion in casciubo.
MINORANCIS AFRICANIS_ Ma no si è fevelât dome di Europe: l’aiar di rinassite pes lenghis fin cumò metudis in bande al rive fintremai in Afriche, come par esempli in Maroc, dulà che il berber (il Tamazight), fevelât des popolazions berberis che a son presintis in diviers stâts nord africans, al à rivât tai ultins agns a cjatâ un ricognossiment tal mieç de “arabizazion” imperante.
Par concludi o podìn dî che tai ultins agns, cu la democratizazion e la pacificazion dai confins, la rinassite des lenghis “piçulis” si fâs simpri plui concrete, ancje se cun tantis dificoltâts; un trend che o sperìn al vadi a cressi simpri di plui.
L’event al è stât organizât cul patrocini dal Ministeri pai Rapuarts cu lis Regjons, de Universitât di Udin, de Provincie di Udin e de ARLeF, e in colaborazion cul CIP (Centri Internazionâl sul Plurilenghisim), cu la Comunitât Montane Tor-Nadison-Cuei, cui Comuns di Cividât e San Pieri dal Nadison / Špietar.
Venusia Dominici