Sfuei Mensîl Furlan Indipendent
Archivi de Patrie

TERITORIS – SLOVENIE. Krško, une centrâl dongje cjase

............

La centrâl
Krško, in Slovenie, sul flum Save, in rie drete a uns 80 km di Lubiane, 60 di Maribor, 40 di Zagabrie, 15 dal confin cravuat

La cuistion des centrâls e de lôr sigurece e je tornade in prin plan a nivel mondiâl dopo dal taramot di 9 grâts Richter che al à tibiât il Gjapon ai 11 di Març stâts e il tsunami che al è scaturît, copant almancul 27 mil di lôr su la cueste orientâl dal paîs e fasint dams une vore grivis al implant di Fukushima (l’acent al va su la “i”). La situazion no je nancje di meti cun chê che si ve in ocasion dal plui grâf incident nucleâr de storie, vâl a dî chel capitât ai 26 di Avrîl dal 1986 (juste 25 agns indaûr) te centrâl di Černobyl’, in Ucraine. Come in chê volte, i guviers dai paîs che a àn sul lôr teritori implants nucleârs o che a àn chê di tirâ sù gnovis centrâls si domandin ce fâ. In dì di vuê, i reatôrs atîfs in dut il mont a son 443, pe plui part tai Stâts Unîts, France, Gjapon e Russie. Di bande sô, la canceliere todescje Angela Merkel, subit dopo de tragjedie dal Gjapon, e à sigurât che il so guvier al larà indevant sul troi che al puartarà tai prossims agns ae dismission totâl des 17 centrâls inmò in vore in Gjermanie.
REFERENDUM_ In Italie il guvier al à fat un pas indaûr, lassant in bande il plan proponût dal esecutîf trê agns indaûr par tornâ ae produzion di energjie nucleâr.
E chest di là dal referendum che si tignì tal Novembar dal 1987, cuant che l’80 par cent dai votants si disè cuintri de costruzion di implants sul teritori talian. Viodint la intenzion dal esecutîf di tornâ al nucleâr, l’an passât si tacà a cjapâ sù firmis par dâi vôs di gnûf ae int in maniere direte midiant referendum. La consultazion che e jere in calendari ai 12 e ai 13 di Jugn e je stade “disvuedade” midiant il stop (dome momentani?) dal plan par tornâ al nucleâr.
DONGJE CJASE_ Chi in Friûl o vin a ce fâ cuntune centrâl, ancje se no si cjate sul nestri teritori, zaromai di uns trente agns in ca. O stin fevelant dal implant logât dongje Krško, in Slovenie, sul flum Save, in rie drete a uns 80 km di Lubiane, 60 di Maribor, 40 di Zagabrie, 15 dal confin cravuat. Ancje il Friûl, si capìs, al è tacât: Udin si cjate a 170 km, Gurize a 145. Une centrâl “di cjase”, che in câs di incidents grâfs e podarès puartânus no pôcs fastidis.
TONDO_ Stant il bloc dal progjet dal guvier talian pal nucleâr e viodint ce che si riscjie tirant sù un implant sul propri teritori, il president de Regjon Renzo Tondo al sburte za di un pôc par rivâ a un acuardi cu la Slovenie par gjestî, finanziâ, slargjâ e modernâ Krško. Une richieste di colaborazion che e à vût une rispueste une vore clipe di bande dal guvier sloven e dal gjestôr de centrâl, che e furnìs ogni an passe un tierç di dute la energjie che si consume in Slovenie. Cun di plui, l’implant, tirât sù ancjemò tai agns de Jugoslavie, al è a miezis jenfri Slovenie e Cravuazie (viôt box ca sot).
TARAMOTS_ Un altri cantin di no dismenteâsi al è chel de sismicitât de aree li che e je logade une centrâl. Come il Friûl, ancje la Slovenie e à vût dilunc de sô storie taramots pluitost fuarts. Un dai ultins (5,6 grâts de scjale Richter) si è vût ai 12 di Avrîl dal 1998, tibiant la Alt valade dal Lusinç. Par altri, come che o viodês te cjartute inte pagjine, une des areis a plui grant pericul di jessi sogjete a taramots e je propi chê di Krško.
INCIDENTS_ Stant che in dì di vuê no esist nissune centrâl dal dut sigure, ancje chê di Krško e à vût i siei incidents. Un dai plui preocupants, che però, stant ai responsabii, nol à fat jessi fûr fughis radioativis, al è stât chel dai 4 di Jugn dal 2008, cuant che il reatôr al fo distudât par vie di une pierdite dal licuit di disfredament. Altris voltis, tai ultins agns, l’implant al è stât fermât: la ultime volte a pene ae fin di Març di chest an, cuant che par un vuast al gjeneradôr idraulic e ae pompe eletriche dal reatôr la centrâl e fo fermade par une setemane.
“REFUDONS”_ Dulà vano a finîle i scarts de produzion di energjie, che a restaran radioatîfs par milenis, che e da fûr la centrâl? Pal moment a vegnin ancjemò ingrumâts sul puest, ma dentri di chest an si scugnarà tirâ fûr un altri sît di pueste. In plui, la Cravuazie tant che paîs co-proprietari e varà di cjapâsi sù il caric di badâ ae metât dai “refudons”. E di agnorums in ca la Austrie e domande in vie uficiâl la sierade dal implant, tignût “vecjo e pericolôs”.
ALESSIO POTOCCO

L'Editoriâl / Risierve di valôr

Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +

Salon Internazionâl dal Libri di Turin 2023

Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +

COROT. Nus à lassâts Sergio Salvi

Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +

Glesie Furlane / Grop amîs di pre Toni. Program dai events pal 2023

1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +