Sfuei Mensîl Furlan Indipendent
Archivi de Patrie

TERITORIS – SLOVENIE. Il turisim vert in Slovenie

............

GREEN PIECE OF EUROPE_Il sproc plui doprât e plui cognossût par puartâ la imagjin de Slovenie fûr dai siei confins al è par inglês the Green piece of Europe, vâl a dî «il toc Vert de Europe»: i adets dal setôr dal Turisim dal guvier di Lubiane no àn di vêi pensât masse parsore, par vie che la Slovenie al è il tierç paîs european a vê plui boscs in rapuart ae sô superficie totâl. Cun di fat, sui 20 mil 273 chilometris cuadrâts dal so teritori, adiriture il 54 par cent (10 mil 900 km²) a son cuvierts di boscs: devant dal paîs nestri vicin a son dome Svezie e Finlandie.
PARC NAZIONÂL DAL TRIGLAV_Par chest lis ocasions par passâ un periodi di feriis in Slovenie framieç de nature incontaminade no mancjin dal sigûr, graziis ancje ae culture pe cure e pal rispiet dal ambient che la int di chenti e à simpri vût. Stant che o sin in plen Istât us conseìn cualchi destinazion, tacant dal unic parc nazionâl di dute la Slovenie: il Triglavski narodni park (Parc nazionâl dal Triglav, o Terglau tal lengaç dal puest). Il parc al cjape dentri 83 mil 807 etars, ven a stâi cuasi 840 chilometris cuadrâts (cirche il 3 par cent dal intiar teritori nazionâl), slargjantsi te Slovenie nord-ocidentâl dal Mangart sul confin cul Friûl a Soreli a mont, a Kranjska Gora a Nord, al lât di Bled a Soreli jevât e a Tolmin a misdì. Il prin progjet di tutele dal teritori dut ator de mont plui alte dal paîs cui siei 2.864 metris di altece al è dal 1908, cuant che in Slovenie a paronavin ancjemò i Asburcs. Se tal 1924 cu la fondazion dal Parc di tutele des Alps la aree comprendude e jere rivade a 1.400 etars, la propueste di doprâ il non che il parc al à ancjemò in dì di vuê e je rivade dal professôr di Botaniche Fran Jesenko tal Mai dal 1926. Dopo de Seconde vuere mondiâl, cuant che par diviers agns la zone e vignive di gnûf doprade par menâ a passon lis bestiis, un decret dal 1961 al puarte la estension totâl a doi mil etars. Dome ai 27 di Mai dal 1981 e rive une leç jugoslave su la tutele globâl dal Parc nazionâl dal Triglav; in ultin, tal Lui dal 2003 l’Unesco e à ricognossût dutis lis Alps Juliis, in part sot de protezion dal Parc dal Triglav, tant che patrimoni mondiâl pe impuartance de sô biosfere.
IL LÂT PLUI GRANT_L’unic parc nazionâl sloven al ufrìs une vore di ponts di interès, massime par chel che al inten la idrografie. Te Val di Trenta al fâs il so prin trat di strade il Lusinç; a misdì dal Triglav al è il Bohinjsko jezero (Lât di Bohinj), il lât plui grant de Slovenie cui siei 320 etars, che si cjate a 525 metris sul nivel dal mâr. Un dai siei emissaris al è la Sava Bohinjka, che e nas propi tal parc, e che cu la Sava Dolinka, un altri riul che al à la sô sorzint a pene fûr dai confins dal parc dongje Rateče bande il confin cu la Carinzie, a dan vite ae Sava, flum di 940 km che al va a finî te Danau a Belgrât.
SALTS DI AGHE_Un altri spetacul de nature a son i salts di aghe, che tal sun onomatopeic de peraule slovene (slap) a rindin ad in plen il rumôr che e fâs la aghe batint sui claps e po finint tal flum o tun lât dopo metris di svol. Par esempli, une des pissandis plui cognossudis e je chê de Savica, sore dal Bohinjsko jezero: alte 78 metris, al è pluitost facil rivâ a viodile dopo une cjaminade di une mieze orute e dopo jessi lâts sù par 500 scjalins sgjavâts tal cret che a menin a un pont di osservazion di pueste.
DOM TRENTA_Il parc dal Triglav nol è dome nature ma ancje storie. Tal paisut di Soča, che al puarte il stes non sloven dal Lusinç, si cjate la Dom Trenta, vâl a dî une sorte di museu li che si puedin viodi i tipics aspiets naturâi cu la flore e la faune de Val di Trenta e de alte Val dal Lusinç. Tal paisut di Trenta invezit si cjate il monument a Julius Kugy (1858-1944), pari dal alpinisim moderni tes Alps Juliis e espert di botaniche.
Par vê plui informazions sul Parc nazionâl dal Triglav lait sul sît internet (scrit par sloven, inglês e todesc) www.tnp.si.
PARCS REGJONÂI_In Slovenie a son ancje trê parcs regjonâi. Il plui grant al è il Kozjanski regijski park, che si cjate a Soreli jevât bande Krško sul confin cu la Cravuazie. Al è nassût tal 1981 e al à une superficie di 19.600 etars. Chest parc al è stât creât in memorie di Josip Broz Tito, muart tal Mai dal 1980: il maressial che al puartà la Jugoslavie a bati i invasôrs naziscj e fassiscj al jere nassût tal 1892 a Kumrovec, localitât cravuate a pene di là dal confin, e cuant che al jere frut dispès al vignive a zuiâ di chês bandis. Une altre curiositât e je che culì si cjate il plui alt rôl di dute la Slovenie cui siei 32 metris di altece.
Par fâ une imersion te nature si pues lâ ancje tal Notranjski regijski park, 22.810 etars a uns vincj chilometris a Soreli jevât di Postumie ator dal Cerniško jezero (Lât di Cerknica), grant 2600 etars a 553 metris sul nivel dal mâr.
Dongje dal Friûl al è ancje il Regjiski park Škocjanske jame, che si cjate jenfri Škofije e Divača. Grant dome 413 etars, chest parc al è nassût tal 1996, in consecuence ancje dal ricognossiment di bande de Unesco des grotis dal puest tal Novembar dal 1986 tant che patrimoni mondiâl de umanitât.
ALESSIO POTOCCO

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +