TERITORIS – OMS DI LIBERTÂT. Bobby Sands, une voie di libertât che no si pues impresonâ (Irlande)

Nassût tal 1954 a Rathcoole, une zone di Belfast a maiorance unioniste, Bobby Sands si cjate a fâ i conts adore cul regjim di discriminazion e di violence che la comunitât nazionaliste irlandese e patìs in Irlande dal Nord. Par vie des menacis dai grups paramilitârs lealiscj la sô famee e je obleade a cambiâ cjase plui voltis e lui al à di bandonâ il so lavôr. Al è cussì che a 18 agns al jentre tal IRA.
Impresonât une prime volte tra il 1972 e il 1976, intal 1977 al ven condanât a 14 agns di preson di scontâ intai Blocs H di Long Kesh là che si zonte aes protestis dai presonîrs republicans cuintri dal tentatîf des autoritâts britanichis di tratâju tant che criminâi comuns.
Par rivendicâ il status di presonîrs politics si decît di inviâ un siopar de fam.
A tacâ al è propit Bobby Sands, il prin di Març dal 1981.
Inte suaze de campagne par poiâ lis rivendicazions dai presonîrs republicans, Sands al ven candidât al parlament di Westminster pe circoscrizion di Fermanagh/South Tyrone e ai 11 di Avrîl al ven elet cun 30.492 vôts. Nancje la sô elezion e fâs però cambiâ linie al guvier britanic vuidât di Margaret Thatcher.
Bobby Sands al mûr ai 5 di Mai dal 1981 dopo 66 zornadis di siopar de fam.
La sô muart e jeve protestis in dut il mont intant che passe cent mil personis lu compagnin in simitieri. I siei scrits de preson a restin tra lis pagjinis plui altis e plui tragjichis de lote di un om pe justizie e pe libertât dal so popul.
CARLI PUP