TERITORIS – La tutele linguistiche no pues restâ dome teorie

Un imprest par dâ pardabon “citadinance europeane” aes minorancis e ae lôr tutele. Al è chest il sens de iniziative cjapade sù dal Comitât des Regjons, che e je stade presentade li dal Parlament european ae fin di Setembar di chest an. Cualchi mês prime, chel che intal contest istituzionâl comunitari al è l’organisim consultîf che al pant il pont di viste dai teritoris e di regjons e ents locâi al veve fat bon ae unaninimitât un Parê dal titul “La protezion e il disvilup des minorancis linguistichis storichis inte suaze dal Tratât di Lisbone”.
Il document dal Comitât al è indreçât soredut ae Comission, l’esecutîf de Union Europeane, e al partìs dal Tratât di riforme jentrât in vore il prin di Dicembar dal 2009, là che si ricognòs la impuartance strategjiche de diversitât culturâl e linguistiche, e de Cjarte dai dirits fondamentâi de Union Europeane, che e fâs cuintri a cualsisedi forme di discriminazion daûr de lenghe e de apartignince a di une minorance e che in graciis dal Tratât stes e je vincolante a nivel legâl. Su chestis fondis al fâs indenant une schirie di indicazions operativis, che a tocjin il completament des fondis juridichis pe protezion positive des minorancis, la prevision di un budget di pueste par azions strategjichis e progjet, l’inseriment concret des lenghis mancul dopradis inte suaze des iniziativis educativis, formativis e promozionâls a pro dal disvilup dal plurilinguisim e in chê dai programs su culture, media e produzion audiovisive.
«O vin volût dâ un sburt ae Union Europeane, par che e torni a movisi in chest cjamp che al tocje sei la culture sei i dirits di fonde di ducj i citadins», al sclarìs Luciano Caveri, il conseîr regjonâl valdostan che tal Comitât des Regjons al à prontât il test dal Parê. «O vin di rivâ a vê un Diretive di  pueste – al zonte l’esponent de UnionValdôtaine – in maniere che si puedi tornâ a vierzi une linie di finanziament specifiche e che i principis e i dirits di fonde no sedin dome alc di teoric». Chel dal  Comitât des Regjons al è dome un prin pas in cheste direzion. Par Caveri «si à di prontâ un stampon di Diretive di fâ indenant inte forme de cussì clamade iniziative civiche». Cun di fat, lis normis comunitariis a previodin che si tirin dongje un milion di firmis di citadins europeans par someti la propueste ae Comission. Che cussì, dentri di trê mês, e scuen fâ alc di concret in rispueste a chei citadins.
MARCO STOLFO