TERITORIS – INTERNAZIONÂL. Madrid cuintri de Catalogne

La sentence dal tribunâl costituzionâl spagnûl sul gnûf Statût di autonomie de Catalogne dade fûr ai 28 di Jugn e à mostrât a clâr che intal stât spagnûl lis stradis par un aument reâl dal nivel di autoguvier des diviersis comunitâts nazionâls a son dutis sieradis.
La decision dai judiçs, che e je rivade dopo cuatri agns che il test al veve passât l’esam dal Parlament catalan, di chel spagnûl e di un referendum popolâr, e à declarât incostituzionâi 14 ponts dal Statût e a ‘nd à riviodûts al ribàs altris 27. Tra i ponts boçâts o cjatìn diviers dai passaçs di fonde dal gnûf Statût tant che l’ûs preferenziâl dal catalan inte aministrazion publiche, il decentrament dal podê judiziari in Catalogne e la pussibilitât di vê cierts spazis di autonomie finanziarie.
Il sens de sentence al è clâr: intal stât spagnûl e esist dome une nazion e ducj chei altris a àn di adatâsi. I judiçs, di fat, a àn sclarît che «par nazion si pues intindi une realtât culturâl, storiche, linguistiche e fintremai religjose», ma ce che ur interesse «e je dome la nazion in sens juridic – costituzionâl e di chest pont di viste la Costituzion e ricognòs dome la nazion spagnole».
Cun di plui, pal tribunâl costituzionâl la lenghe catalane no pues vê un caratar di preference dal moment che intun sisteme di couficialitât lis lenghis a àn di jessi sul stes nivel. Un principi che però al vâl dome par limitâ lis lenghis propriis des comunitâts autonomis, dal moment che i stes judiçs a ricuardin che ducj a àn il dirit di doprâ la lenghe che a àn miôr intes relazions cu lis autoritâts locâls, ma che cognossi il castilian al è l’unic oblic fissât de Costituzion.
La sentence e à fat cressin inmò di plui il marum dai catalans che ai 10 di Lui a àn jemplât lis stradis di Barcelone par protestâ. Ae manifestazion, clamade adun dal Òmnium Cultural, a àn rispuindût passe un milion di personis (lei chi dongje il coment di Sandri Carrozzo, ndr). A poiâ cheste proteste a son stâts però ancje i catalans ator pal mont e chês altris nazionalitâts minorizadis sei dentri (lei l’articul su la manifestazion a Donostia, ndr) che fûr dal stât spagnûl (il Plaid Cymru galês al à fintremai presentât une mozion in proposit intal Parlament britanic, ndr).
La decision dai judiçs e à metût in dificoltât i socialiscj catalans che, par altri, a viodin a clopâ simpri di plui la aleance di guvier cun ERC e ICV-EUiA. Cun di fat, se ducj i partîts catalans a àn cjapât la sentence cu la bocje garbe, ognidun al somee proponi une rispueste divierse. Tra la int, invezit, e cres la sensazion che, sierade la strade de riforme statutarie, la uniche soluzion che e reste su la taule e sedi chê de indipendence.

Miârs di bascs in place al flanc dai catalans_ Ai 10 di Lui no si à manifestât dome a Barcelone, ma ancje a Donostia. Cun di fat, passe dîs mil personis a àn rispuindût al apel fat indenant di Eusko Alkartasuna, Alternatiba e de çampe indipendentiste basche. A vierzi la manifestazion al jere un strisson cu la scrite «Nazioa gara. Autodeterminazioa», ven a dî «O sin une nazion. Autodeterminazion». La sentence dal tribunâl costituzionâl e à sburtât ancje i bascs a rivendicâ il dirit di decidi di bessôi il lôr avignî e a domandâ che a puedin fâlu ancje i catalans. Cheste solidarietât e je stade marcade ancje de delegazion basche che e à partecipât ae manifestazion di Barcelone.
Carli Pup