Dopo Carnicats e Straulino, i R.Esistence in dub al Liet Festival 2010 par provâ a puartâ in Friûl il sucès te rassegne europeane de musiche di minorance
«A canzoni non si fanno rivoluzioni», al cjantave Francesco Guccini. Ma tant altri sì. Si pues fâ culture e integrazion, par esempli, a ritmi di buine musiche. Viodi par crodi, ai 27 di Novembar a laran sù sul palc dal Liet Festival 2010 undis grups che a rivin di dute Europe – de Galizie ae Russie, des Isulis Faroe a Cipri – par esibîsi inte rassegne plui impuartante di musiche in lenghe minoritarie, ospitade chest an de citât bretone di An Orient, Lorient pai francês. L’event, inventât dai frisons e rivât ae sô setime edizion (cul patrocini dal Consei di Europe e il supuart tra chei altris de Arlef), si è concuistât visibilitât internazionâl e la capacitât di atirâ simpri plui zovins: bascs, cors, ocitans, bretons, sarts, pronts a meti in melodie la anime di ancjetantis culturis minoritariis.
E ancje chest an, te caravane musicâl no mancjarà une rapresentance de Patrie: il rapper Mauro Tubetti, in art Dj Tubet, e i siei R.Esistence in Dub, unics talians selezionâts (vincidôrs dal vôt popolâr ae kermesse partner Suns 2010), a sfidaran i coleghis cul toc «Fieste», cjançon di denunzie cuintri la mancjance di spazis di incuintri pai zovins furlans che dispès si cjatin cussì a organizâ «fiestis» no dal dut legâls (viodi ae vôs «rave party» e similârs). Il ritornel al è un regâl ae celebre vilote popolâr «Ciribiribin, doman e je fieste». Il grup al è nassût intal 2006 dal incuintri di cuatri zovins musiciscj de provincie di Udin e si è contrassegnât fin di daurman pal ûs de lenghe furlane, fondint elements classics de tradizion popolâr cun stilemis de musiche eletroniche dub-reggae. Intal Dicembar 2007 a àn vinçût il «Premi Friûl», dedicât al miôr grup emergjent dal an cun tescj par furlan.
Cundut che a sedin stadis presincis di rivuart – intal 2009 il «contestoriis di Sudri» Lino Straulino si classificave al tierç puest, e stes risultât pai rappers cjargnei Carnicats intal 2008 – fin a vuê nissun furlan al à vinçût il Liet Festival. Cuissà che chest an no si cambii musiche: scomencìn a preparâ i «clicks» parcè che ai 27 di Novembar, in concomitance cul event, si podarà votâ in linie il propri grup preferît ae direzion www.liet.nl/en/internationaal. E l’an prossim, dopo jessi stât ospitât in Frisie e Laponie, e cumò in France, il Liet al disbarcjarà infin a Udin.
Natascia Gargano