TERITORIS – AUSTRIE. L’aeropuart di Viene al è la puarte pal orient

La ete moderne de aviazion e je tacade a Viene cul pionîr Alois von Beckh-Widmanstätten tal Sietcent, scuasit in contemporanie cul svilup mondiâl che al note l’inizi ai 21 di Novembar dal 1783, cul prin svol uman suntune mongolfiere dongje di Parîs.
I protagoniscj de aeronautiche moderne, ven a stâi i costrutôrs dai aeroplans «plui pesants de arie», a nassin un secul plui tart. L’om de prime ore al è stât l’austriac Wilhelm Kress, fi di emigrants todescs: nassût a Sant Peterburc, tal 1873 al à stramudât a Viene, dulà che al al à metût man ae costruzion di aeronâfs. Dal 1898 al 1901 al à metût adun il Kress’sche Drachenflieger (il drâc svolant), un idrovolant a motôr. Ai 3 di Otubar dal 1901 al à fate une prove sul lât di Wienerwald, za doi agns prime dal prin svol dai innomenâts fradis Wright.
Il prin a fâ svolâ un avion tal Imperi Austroongjarês al fo Edvard Rusjan, di pari gurizan sloven e di mari furlane (Grazia Cabas, di Migjee). Ai 25 di Novembar dal 1909, sui prâts de Campagnuzza/Mali Rojci, Rusjan al à rivât a fâ svolâ il biplan EDA I. In chel istès timp, il pionîr austriac Igo Etrich al à metût man ae costruzion dal Etrich II, clamât Taube (che par todesc al vûl dî «colomp»). Pe sô capacitât di jessi scuasit invisibile, la machine e je stade doprade te Prime vuere mondiâl tant che ricognidôr. Impleade  in diviersis ocasions za tal 1911, e jere stade doprade des fuarcis talianis in ocasion de vuere di Libie, dulà che il «colomp» al è deventât il prin avion a fâ azions di bombardament.
Aeropuarts internazionâi in ogni regjon_ In dì di vuê, aeropuarts comerciâi si cjatin a Viene-Schwechat, Graz-Thalerhof, Innsbruck-Kranebitten, Klagenfurt-Annabichl, Linz e Salisburc Hörsching-Maxglan. Chei di Graz e di Linz si doprin ancje par finalitâts militârs.
Cent agns indaûr, il plui moderni aeropuart dal mont_ L’aeropuart storic di Aspern, te perifarie Est de capitâl, al è stât il plui grant aeropuart in Austrie, il predecessôr di Viene-Schwechat. Viert ai 23 di Jugn dal 1912 cuntune manifestazion aerie cun cent mil spetatôrs, al è stât par chei timps il plui moderni aeropuart dal mont. La storie di Aspern e je finide prime di scomençâ, cul tacâ de Prime vuere mondiâl; po dopo, propit chi, tal Març dal 1938, Himmler – cuntun comant nazist – al à preparât il Anschluss de Austrie.
Viene-Schwechat impastanât de Luftwaffe_ La Luftwaffe todescje e veve impastanade une base militâr a Schwechat, li che dal 1942 a jerin stâts  produsûts ancje i cjacebombardîrs HE 162 Volksjäger. Doi agns dopo, une part de base e je stade doprade tant che cjamp di concentrament. Tal 1945, i militârs britanics a àn implantât la base RAF Schwechat, e un an dopo la British European Airways e à scomençât cul trafic civîl.
Daspò de indipendence, la Austrie e à ricjapade la paronance e e à viert tal 1954 l’aeropuart pal trafic civîl. Tai timps de tendine di fier, Viene e je stade pe sô neutralitât politiche une des destinazions plui cirudis. Cul slargjâsi de Ue, nol è dome cressût il numar dai passizîrs ma ancje il volum de marcjanzie: il Vienna International Airport (VIE) al è deventât il centri logjistic di une vore di aziendis che a operin in dut il spazi dal ex bloc orientâl. Dal 2007, e je cressude ancje la impuartance tant che pont di partence pes lungjis destinazions: la Korean Air e svole direte a Seul e di Atlanta e rive la Delta Air Lines.
Tal Setembar dal 2005 e ven prontade une gnove tor di control, che cui siei 109 metris e je la plui alte di Europe e la cuarte plui alte dal mont dopo Bangkok, Kuala Lumpur e Atlanta. Il 30 par cent cirche dai passizîrs che a son in transit a Viene, a partissin viers est e il Medi Orient.
JANEZ ERAT