Sfuei Mensîl Furlan Indipendent
Archivi de Patrie

TERITORIS – AUSTRIE. Al cres l’interès pal sloven tes scuelis carinzianis

............

Tal teritori tutelât cu la leç di minorance, 1.975 students si son iscrits pal insegnament bilengâl su un totâl di 4.395
La situazion gjeografiche de Carinzie orientade viers la Italie e la Slovenie e domande simpri di plui personâl cualificât multilengâl. Par garantî l’insegnament dal sloven a un nivel alt, a cause di pensionaments in cors, si spietisi pal futûr une mancjance di insegnants pe istruzion in lenghe slovene. Anzit, il Consei scolastic provinciâl al vise i students e ur sugjerìs di completâ la profession di insegnant pe lenghe slovene.
I dâts in detai_ Tal an scolastic 2011/12, tal teritori di aplicazion de leç su la scuele di minorance si previôt in 71 scuelis di istruzion elementâr l´insegnament bilengâl. Di fûr di cheste regjon, si pues cjatâ la educazion bilengâl in dôs scuelis te capitâl Clanfurt.
Di un totâl di 4.395 students (4.385 l’an precedent), 1.975 (1.928) si son iscrits pal insegnament bilengâl: si trate duncje di une percentuâl dal 44,93%.
Scuelis superiôrs e professionâls di minorance slovene_ Il gjinasi sloven di Clanfurt al è frecuentât di 506 arlêfs (503), il coleç federâl bilengâl comerciâl di Clanfurt di 163 (161), e il coleç privât economic a St. Peter / Šentpeter di 124 students (118). Cussì, in struc, in dutis lis trê scuelis superiôrs dulà che il sloven al è ecuivalent cul todesc, o contìn plui interessâts rispiet al an scolastic stât. La percentuâl complessive di students iscrits tal an scolastic 2011/12 in Carinzie pe istruzion o pal insegnament bilengâl sloven al è di 4.006.
Janez Erat
_____________________________
Il Burgenland al fiesteze 90 agns di vite
Il Burgenland (ongjarês Őrvidék, cravuat Gradišće) al è il stât federâl austriac plui zovin e, salacor, il Land plui atipic. Ancje se mancul cognossût, al è culturalmentri plui siôr di altris regjons austriachis e al à une storie une vore interessante. In confront ae tipiche Austrie alpine, o vin chi, ator dal plui grant lâc austriac (il lâc di Neusiedl) un clime panonic cun pocje ploie e 300 zornadis di soreli ad an.
Prime de seconde vuere mondiâl e je stade la regjon plui puare, cuntune fuarte emigrazion viers la Americhe: ancjemò vuê, o cjatìn olmis che nus fevelin di citâts americanis. Cussì, par esempli, un distret de citât Kittsee si clame vuê Chicago. In chel timp, la int e scherçave che Chicago al fos il cjâf lûc dal Burgenland.
Cu la nassite de Austrie atuâl dopo la tragjiche vuere, il zovin stât si mudave intune regjon moderne soredut tal cjamp de energjie alternative: chi si cjate il plui grant parc eolic in Austrie. Secont i politics locâi, il Burgenland al sarà energjetichementri indipendent fin al 2013. No cate il trend positîf dai ultins agns, si trate però di une regjon periferiche dal pont di viste economic: par colpe de mancjance di puescj di vore, tancj a son costrets a cirî lavôr a Viene.
Cul Tratât di pâs di Saint Germain che al cirive di rispietâ i confins etnics, la Austrie e cjapave la regjon ongjarese clamade ancje “Deutsch-Westungarn”. Dopo une fuarte resistence armade organizade di volontaris ongjarês, si à decidût di tignî un plebissît pal determinâ il status de capitâl (ongjarês Sopron/todesc Ödenburg), insiemit a chel dai comuns dulintor, ai 14 di Dicembar dal 1921: il 65% dai vôts al è stât pe Ongjarie. Il zovin Burgenland, a pene nassût, al à pierdude la sô capitâl; in Ongjarie invezit si fiesteze chest risultât e di chel timp indevant la citât Sopron e je clamade “Civitas fidelissima”.
Dopo la pierdite dal cjâf lûc de regjon al è stât riorganizât il gnûf stât federâl. Il non Burgenland nus vise che il teritori al jere storichementri componût di trê conteis ongjaresis. Dopo diviersis propuestis a àn semplicementri tradusût la peraule ongjarese “vármegye” (ongjarês Vár = todesc Burg) che al jere il non storic de unitât aministrative ongjarese. La gnove capitâl e je deventade la piçule e insignificante citât di Eisenstadt (ongjarês Kismarton), cun dome 12 mil abitants.
Il Burgenland plurietnic_ Storichementri, la percentuâl dai grups linguistics autoctons e je stade tor il 40%, vuê mancul dal 10%. Di chel, il plui grant al è il grup di lenghe cravuate (5,9%), e dopo a vegnin i ongjarês cun dome il 2,4%. Il numar dai roms nol è clâr parcè che dome pocjis personis si declarin di marilenghe rom: la gjenerazion dai zovins e à in pratiche za pierdude la lenghe.
Cu la modernizazion de agriculture si pierdin lis struturis tradizionâls, e chest al à un impat diret negatîf su la comunitât comune cravuate. De pierdite de lenghe di minorance tra i zovins nol è responsabil dome un clime di assimilazion, ma soredut la situazion economiche di cheste regjon. Il Burgenland si declare un paîs cuntun passât multietnic, cence controversiis di minorance viers maiorance, come che o cognossìn in Carinzie. In pratiche però, si limite la presince des minorancis te vite di ogni dì simpri di plui a un nivel dome folcloric. (J.E.)

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +