TERITORI – PORDENON. Une massarie plene di «sgarpions»

Ancje se in prime batude al pues someâ strani, intune stesse massarie a puedin convivi machinis tituladis che a àn fât la storie des corsis intai circuits, e tratôrs che a àn masanât chilometris in lunc e in larc tai cjamps di mieç Friûl.
A rindi pussibil dut chest al è Bruno Dorigo, un om di 60 agns, colezionist braurôs di Abarth (lis famosis machinis di corse elaboradis, cul sgarpion) e agricultôr a timp plen. Inte sô massarie, une vore batude di passionâts e di curiôs, ogni an abarthiscj di dute Europe si cjatin par fevelâ e par visâsi des impresis des machinis cul sgarpion.
PERLIS_ La prime des dîs «perlis», Dorigo le cuiste tal 1988 daspò vê let une inserzion intun gjornâl li che si diseve che a Milazzo e jere in vendite une 1000 Tc Gr.2. Di li indevant, la colezion si slargje e si insiore di dute une schirie di tocs, cimelis, fotografiis e documents che a metin in lûs  une spropositade passion pe marcje dal sgarpion; passion che a à vût un moment une vore alt l’an passât, cuant che la femine di Karl Abarth (talian austriac fondadôr de marcje) e je stade trê dîs li di Bruno par fiestezâ il sgarpion (il segn zodiacâl dal fondadôr).
CAPANON MUSEU_ Bruno, di bon furlan al dîs: «Jo te me vite no ai mai butât vie nuie, anzit, o ai simpri tignût dacont dut»; e a ben cjalâ no si pues che dâi reson. Tal capanon destinât a museu, a son parcadis une vecje 600, dôs 1000 TC, une 1000 TC Gr.2 (che tal 71 e à vint la Verzegnis – Sele Cjanzutan e che Dorigo al torne a puartâ spes li e ae Cividât – Madone di Mont, tant che «vierzi piste» di ecezion), une 1000 biarbul, une 750 Zagato, une Scorpione Francis-Lombardi 1300, une Abarth 695 e une formule 2000 monopuest. La carateristiche di dutis lis machinis e je che a son tignudis tant ben che a somein fatis di une setemane, ancje se cualchidune e je stade tirade in ca cuntun lavôr di caroçarie pardabon impressionant.
L’aspiet “contadin” dai motôrs, invezit, si impâr cjalant la dismisurade colezion di 60 tratôrs (si impiin ducj – al ten a marcâ Bruno) e di machinis agriculis metudis in ordin sot di un capanon di len: Stayer, Busatto, Ottomelara, Same, Fiat, Ford, Renault e altris, che dispès a vegnin metûts a disposizion di manifestazions e di mostris sore nuie.
Chest al è un detai che si à di meti in evidence par capî il spirt di Dorigo, che al dîs: «se cualchidun al à voie e gust di viodi la mê colezion e lis belecis de campagne, baste une telefonade e vonde».
Sandri Olivetto