TERITORI – PORDENON. Mandi Poetesse

…denant dal scrivi i ai imparât a fevelâ, e tal fevelâ di Navarons. Navarons al è un bûs pierdût, una vila pierduda intal Midun. Il fevelâ di Navarons al è stât il prin vistît
dal gno penseir. La prima peravala che i ai dit, la ai dita par navaronsin, il prin penseir che i ai tirât dongja al veva che forma i. Che lenga i. Par fâ poesia, jo na ai doprât altri furlan, na ai scrit nencja par talian, nua di poesia, mai, doma il navaronsin al mi è zovât, dome il navaronsin
al mi à sunât prima che ta li ureli tal cour, parcè al à dit
ce che i pensavi e ce che i eri.
Propit sul finî de resint edizion di Pordenonelegge, e je rivade come un tarlup in plene gnot, la notizie de muart di Novella Cantarutti. Il Friûl ocidentâl, daspò di Beno Fignon, al piert cussì une altre figure fondamentâl de culture e une elegantissime interprete de societât furlane e dai siei plui autentics aspiets.
Nassude a Spilimberc, e à vivût gran part de sô vite a Udin, li che e à insegnât aes scuelis superiôrs, daspò vê direzudis par cualchi an lis scuelis miezanis di Spilimberc.
DI PIÇULE_ La sô infanzie le passe a Navarons, paîs li che e je nassude sô mari, e borc che jê e à simpri considerât la tiere des sôs lidrîs plui ancestrâls. Pai siei scrits e à simpri doprât il furlan «navaronsin», chel che jê e sintive, e e considerave, come il so unic veicul par podê pensâ e scrivi di un paisaç uman e di lûcs de tradizion furlane.
Novella Cantarutti e scriveve cuntune straordenarie naturalece, intun furlan (une variant no normalizade) che al smirave a mantignî intatis lis sô origjins e di conseguence la «essence» di un furlan scuasit arcaic, caraterizât di une cjadince e di une fonetiche di cjase jenfri Val Colvare e Val Midune. Te sô lungje cariere di scritore e à scrit ancje par talian, simpri rimarcant però che dome metint jù peraulis par furlan e rivave a meti su cjarte la vôs dal so pinsîr plui autentic.
I ARTICUI_ Dongje lis publicazions impuartantis, la Cantarutti e puartave il so scrivi «cul sintiment» ancje su rivistis e periodics, lassant un segn ancje su lis pagjinis de «Patrie dal Friûl».
Di zovine e studie a Udin, li dal Coleç delle Zitelle, tape fondamentâl te sô vite inteletuâl,  ancje par vie dal incuintri impuartant cun Josef Marchet, professôr di latin che le svicine a Risultive (il grup leterari nassût tal 1949 propite par iniziative di Marchet), cence però rivâ a voltâle a doprâ lis regulis linguistichis de coinè.
Daspò vê scomençât la universitât a Milan, e je obleade a molâ il cicli di studis par vie de vuere, ma tal 1952 e puarte insom il so percors, laureantsi in Letaris ae universitât di Rome, e publicant i siei prins scrits poetics.
COLABORAZIONS_ Tai prins agns de seconde vuere mondiâl e subite daspò, i siei scrits a insiorin il panorame de leterature furlane cun colaborazions come cun «Ce fastu?» (il boletin uficiâl de Filologjiche), cun Strolic furlan e cul Cuader romanç dal so grant amì Pieri Pauli Pasolini. Chest le invide a fâ part de Academiute de lenghe furlane (ancje se jê e à simpri mantignût une libertât assolude, e no si è mai sintude part di nissun grup) e dal so mût di scrivi in lenghe navaronsine al dîs: «Lis so curtissimi lirichis… a vibrin di une trasparence linguistiche di prin ordin, cun imagjinis essenzialissimis e cjamadis».
I personaçs come Novella Cantarutti a capitin rarementri e pe culture furlane e gjenerâl a son une mane dal cîl, tant che tirâ une some di dut ce che e à fât e lassât al è scuasit impussibil. Cuant che il Friûl al è stât scjassonât e ferît fisichementri dal Orcolat, la Cantarutti si è fate in cuatri par cirî di salvâ plui che e podeve il patrimoni culturâl furlan, par evitâ un doman di vaî ancje pes feridis ae culture.
Lis sôs ricercjis in teme di tradizions furlanis, a àn metût dongje intun tesaur inestimabil, proverbis, contis, storiis, preieris e detulis, risultât di un scandai fat tai lûcs li che e jere nassude ma ancje ator par chel Friûl che no à mai smetût di volêi ben.
Sandri Olivetto