TELEVISION, CINE E TEATRI. Sprofondâ o svolâ? Sielç trop jessi “lizêr”

Primissime esibizion: batiman, «bis», «sunait inmò une volte». «Cui? Nô?». E tache cussì la storie di une formazion – i “¿Cuinon?” juste apont – aromai plui di dîs agns za fa. Vuê il grup al è avonde consolidât e dal sigûr usât al preseâ dal public. No son deventâts une bande di sagris cun maiute pai fans. No si cjatin dispès ator, a àn la lôr cifre in pocjis robis ma fatis ben, cuntune lungje ricercje contenutistiche e musicâl. Tant che il lôr gnûf lavôr al rive daspò di doi agns di cidin interot dome dal spetacul multimediâl “Croseris Vitae”. Il disc si clame “Lisêrs” e al propon 11 cjançons une vore diviersis, dulà che si spazie jenfri sonoritâts jazz, country, rock e folk. «Il jessi “lizêrs” al è il motîf principâl dal album, ma al va capît cuntun dopli sens», al sclarìs Roberto Foglietta, vôs e “ment” dal grup. Lizêrs al è il dret ma ancje il ledrôs: «Lizerece come il jessi serens, libars dai prejudizis e dai condizionaments che nus impedissin di capî l’essenziâl (“Lisêrs, cui voj cuasi vierts, cui bračs ben slargjâts par svolâ ancje par cjere”), ma ancje come condane e privazion». Lizêrs parcè che privâts dal “pês” de dignitât, come i nordafricans imbarcjâts intai viaçs de sperance viers lis cuestis europeanis (in “Lalib”, ispirât al libri di Fabrizio Gatti, Bilal). Lizêrs parcè che liberâts de cjame de storie e, cun jê, des responsabilitâts (“no vuei, no lei, par vuei no ai voi”), come se a fossin dotâts di une memorie “curte” (il toc “Mbt” al conten ancje lis peraulis di une anziane ospite di une cjase di polse). O lizere come la etât de infanzie (“tignîmi a giujâ, j soi frutìn”), che no àn cjerçât i 300 mil fruts soldâts intal mont. Argoments che nus dimostrin ancje che fâ musiche in lenghe furlane nol vûl dî cjantâ dome dal nestri “piçul ort”. La sensibilitât slargjade al contest sociâl e marche cun fuarce la identitât di chest grup che si cjale ator cui voli dai 25 e dai 50 agns: «Il nestri al è un grup intergjenerazionâl, a dimostrazion che si pues fâ buine musiche e si pues creâ une formazion che e funzione ancje tra gjenerazions lontanis», al dîs braurôs Roberto che, dit cussì passant, di mistîr al fâs l’educadôr. “Achedojo (H20)” e fevele dal aur blu, font di vite ma tal stes timp di vuadagn e di conflits, la “Cjante dai nons” al è un toc ispirât al libri di Oriana Fallaci “Un uomo”. Ma no stait a preocupâsi, i “¿Cuinon?” no si cjapin simpri cussì sul seri. “Condanâts” a scrivi tescj impegnâts, scoltait chi ce che a àn parturît: “J gjolt in ta scovace/mi sbat e j pissi in place/j strassi ancje il pan sut e dapît un grant biel rut” [gjavade fûr di “A cussì (par une dì)”].
Natascia Gargano