«Te “perifarie” si respire talent e grande creativitât»

Tal so lavôr, Stefania Carlotta Del Bianco no à mai sintût di scugnî fâ plui fadie di un coleghe om. «O soi tra lis feminis fortunadis che no àn mai vût di patî compromès». Ma se dificoltâts di gjenar te suaze professionâl no ‘nd à vudis, a son stadis invezit tal rapuartâsi – jê che e ven de “perifarie” – cui “centris”. «Mi è capitât di vê a ce fâ cu la paronance dai “centris”, convints di vê plui robis di dî, parcè che cûr di tantis ativitâts o risulte di zovins in cercje di formazion o lavôr. Jo o crôt, invezit, che no sedi une cuistion di “gjeolocalizazion”, ma di cualitât e volontât».
◆ «Se di une bande al è verisimil che intes grandis citâts a sedin plui lûcs-oportunitâts, nol è dit che lis pussibilitâts, intune scjale di valôrs, a sedin plui meritoriis di altris che si fasin fûr dal “centri”. Il snobisim bande de “perifarie”, tant che ultime ponte de culture, mi somee cetant infondât e datât. A son realtâts impuartantis, ancje teatrâls, che pûr cjatantsi in lûcs altris, a son une calamite vitâl e prolifiche, dulà che si respire talent e grande creativitât». ❚
E.A.