Lu cognossìn di agns pe sô ativitât di cjantant, ma dome cumò al ven fûr il prin album uficiâl di Dj Tubet. «Fin Cumò» al è un belanç dai ultins dîs agns. Al ven fûr su cd e al è presint ancje su Spotify
I apassionâts di musiche in lenghe furlane chest an a varan un regâl di Nadâl di bande di Dj Tubet, non artistic di Mauro Tubetti. Al ven fûr il sô prin album uficiâl, disponibil su cd e su lis plateformis digjitâls.
__
Mauro, cuant che o ai let che al ven fûr il “prin album uficiâl di Dj Tubet” o soi restât: a son agns che ti sintìn cjantâ… No tu ‘nt vevis mai fat un?
Chest al è il prin lavôr discografic di “solist” produsût fûr par fûr di me, dal pont di viste discografic e musicâl.
Prime di cheste jessude discografiche o vevi za screât il non Dj Tubet su cualchi supuart in vinîl o cd: a jerin singui dulà che il gno apuart creatîf al jere dome chel di “rapâ” parsore dai ritmis di altris produtôrs.
__
Ce titul aial l’album e ce aial dentri?
Si clame «Fin Cumò»: e je une racuelte dai miôr singui tra il 2011 e il 2020.
Al è un viaç tra lis lenghis, lis tradizions e i sunôrs des colaborazions resintis cun atris rappers o cjantants. Si fevele di ricjece e di puaretât, di soference europeane e africane, di valôrs di lassâ aes gjenerazions che a vignaran, di estasis mistichis, di spiritualitât, di unitât dal gjenar uman ma ancje di robis plui lizeris tant che il podê de musiche di fâ stâ ben la int.
__
La grafiche e je particolâr, un grum agns 90. Le àn fate chei de Friûlpoint – Maiutis par furlan. Disinus il parcè di chestis sieltis.
La prime volte che o ai metût cun braùre une maiute Friûlpoint intun conciert a jerin cuasi 20 agns indaûr… Mi plâs une vore la lôr linie di design. E cussì o ai pensât che a varessin insiorât il valôr dal Cd cul lôr snait grafic.
I colôrs e il stîl comunicatîf a riclamin i agns 90 par vie che la musicalitât dal disc e à alc di chei agns. In cuvierte o soi jo che o fâs une “F” cui dêts, simbul di Friûl: e je une traduzion culturâl dai “hand sings” che in Americhe a fasin i rappers par mostrâti che son dentri di une cierte bande. Cui che al fâs la “F” cussì al fâs part de band furlane (mi cimie, ndr).
__
A publicâ il disc e je la etichete Centedischi che al è simpri un to progjet, no mo?
Sì, in gracie de pandemie o ai podût vê il timp di imparâ il mistîr burocratic par publicâ i discs. “Cente” par furlan e je la muraie che e coventave par difindi il centri di un paîs in câs di atacs. E je ancje une borgade dal gno paîs, Nimis. Centedischi e à un pôc la stesse funzion: protezi l’artist e pandi la sô opare.
__
Cemût promovistu l’album in timps di Covid?
Il disc al è presint tai canâi digjitâi, par esempli Spotify, che o ai vierzût cumò. Duncje, la plui part dal lavôr promozionâl al è fat on line.
A pene che si podarà tornâ a saltâ fûr, vulintîr o pensi di fâ cualchi serade di pueste par presentâ il lavôr. Par intant o speri di fâmi viodi cu lis intervistis e cu lis recensions che o speri che a rivaran in chest timp di lockdown.
__
Ce moment isal chest pe musiche in lenghe furlane?
Tal disc a son lis primis rivisitazions di vilotis, plui gjenars musicâi e plui lenghis, dopradis in maniere cussiente. Cheste, la diference cul passât.
O viôt la vilote come il gjenar mari di nô furlans: un macro gjenar tant che il blues o il jazz di dulà che al partìs dut. Cheste e je la “novitât antighe” che si sta slargjant tal panorame culturâl e musicâl furlan. E pues jevâ sù un gnûf rinassiment musicâl.
«Fin Cumò»… Isal ce che o vin fat Fin Cumò, o cumò ise la Fin di ce che o vin fat?
__
Progjets futûrs, tu che no tu stâs mai fer?
In chel periodi ca mi sta plasint il discors des musichis pai fruts cun intervents tes scuelis. Po dopo, o stoi metint dongje lis musichis di un prossim cd e mi prepari par tornâ sui palcs.
__
Par vê il cd o info sul progjet, dulà podìno lâ?
Sui social mi cjatais zontant /djtubet al non dal social in cuestion. Al è publicât su Spotify e in forme di cd si cjatilu tai negozis di musiche dal Friûl.
O podês fâ un salt su www.djtubet.com pes novitâts e par lei i tescj e lis traduzions. ❚
Dree Venier
