- ANGELA FELICE
Il 1996 e je une date spartiaghis inte tradizion dal teatri furlan o, miôr, di chel teatri che al unìs la scriture ae sô trascrizion seniche, il test al spetacul. Une storie lungje, che ancje in Friûl, almancul de metât dal Votcent, e fâs dal teatri dal vîf une ocasion favoride pe trasmission di valôrs, ideis, umôrs coletîfs, identitâts ancje linguistichis. Si cree e si infuartìs cussì intal timp ancje une sorte di sisteme che, in mûts diviers intal Votcent e intal Nûfcent, si inricjìs di dramaturcs che a progjetin la lôr scriture in funzion de sene, e naturalmentri di atôrs, di preparadôrs di spetacui e di compagniis, sburtâts de passion disinteressade de esperience amatoriâl.
In cheste biele vicende, il 1996 al puarte duncje une cesure fuarte. Di fat, al è l’an de preparazion dai Turcs tal Friûl di Pasolini, là che, sot de vuide di Elio De Capitani, un professionist de sene, e ven coinvolzude la flôr dai atôrs furlans diletants, metûts ae pâr cun cualchi “coleghe” di mistîr, cemût che al è stât il câs, par esempli, di Lucilla Morlacchi e, pe partidure musicâl, di Giovanna Marini. Al è stât un fat sflandorôs, restât lezendari no dome pai risultâts artistics alts o pe dimostrazion, in graciis di Pasolini, che il furlan al podeve jessi pleât ancje al sublim de tension tragjiche. Soredut, di chê esperience e madrès in tancj atôrs furlans une gnove cussience, che e sburte tancj di lôr, massime chei zovins, a fâ un salt di cualitât e a sielzi il teatri tant che reson di lavôr, di mistîr e di vite.
E duncje, intant che il teatri amatoriâl al va indenant pe sô strade “popolâr”, ve che di li si invie il fenomen di une gnove vivarosetât teatrâl, che e esalte in particolâr i agns Novante dal secul passât.
Si crein laboratoris, si sperimentin spazis no convenzionâi tant che intal curtîl dai Colonos, par fâ e par proponi teatri, a vegnin sù autôrs gnûfs di ultime gjenerazion, a nassin compagniis zovinis di atôrs, e anzit cualchidun di lôr al introdûs inte scriture pal teatri ancje la figure moderne de atore-autore, che si cûs intor la proprie partidure verbâl e gjestuâl, pensade par afabulazions solitariis o par un coletîf, intal câs di lavôrs di grup. E risalte soredut la cussience fuarte che ducj a frontin e a interpretin il propri impegn pe sene, e specie par chê par furlan. Chest al pâr anzit il risultât di sieltis claris e motivadis, là che ancje la adozion dal codiç linguistic e cjape origjin no di propuestis esternis, plui o mancul imponudis dal aiar che al tire, ma di intindiments comunicatîfs precîs e di tematichis specifichis: che si trati di sene comiche, come intal câs dal Teatro Incerto, o di sene dramatiche, come – par fâ cualchi esempli – pes dramaturgjiis di Paolo Patui, Paolo Sartori, Carlo Tolazzi e altris ancjemò.
Al è clâr che alore di li a nassin scrituris e pratichis sigladis di sensibilitâts marcjadis, cuasi cun firme di autôr, che dopo, singolarmentri, e alimente une oficine personâl, furnide ancje de pratiche robuste cu lis regulis dal scrivi (e dal fâ) teatri, e pensade par progjets espressîfs specifics, no par puartâ aghe al mulin di chê che i disin identitât o de difese de lenghe. Aspiets, chescj ultins, che a puedin ancje jessi presints, ma, intal teatri che al funzione, tant che seconde istance e tant che consecuence indirete.
Ma vuê, ce restial di chel ferment? Aial impiade une flamade dome episodiche o aial metût pardabon lis semencis dal futûr? Intai orizonts temporâi fluits di vuê e di doman, al pâr dificil dissegnâ une mape clare, buine di fissâ panoramis definîts e percors no ocasionâi. Di fat, il senari teatrâl furlan di cumò al pâr un teritori di isulis, no di penisulis e tant mancul di continents. La mê impression e je che si sedi smamît chel humus spontani di condivision coletive, cuasi un spirt di moviment difondût, che al à coltât il passât resint, unint atôrs, autôrs e public intune spiete comune e intune comune tension. Vuê al pâr che ognidun, cuant che nol à butât jù lis armis, al procedi e al lavori par cont so, meteore e no astri di une costelazion.
Segn dai nestris timps slavrâts, confondûts e passîfs, si disarà, intun moment epocâl che, ancje in Friûl e intal so teatri, al sa di transizion. No ai la sfere di cristal par azardâ ipotesis di viis di jessude. O sai però che lis veris soluzions no podaran vignî ope legis o di incentivazions plui o mancul caladis dal alt, cemût che par esempli al è sucedût cu la esperience de Farie teatrâl furlane. Une ocasion pierdude, cheste ultime, che anzit, pai siei risultâts deludents e pe mancjade condivision dal bas, e à contribuît a morestâ no di pôc i entusiasims di tantis inteligjencis teatrâls dal Friûl, di là des stessis spietis dal public. E duncje, mi limiti a constatâ che in ogni câs cualchi nestri autôr e teatrant plui inovatîf al va indevant a comparî ogni tant, in trincee, si disarès, e inte sperance che il “sisteme” teatrâl dal teritori al torni a scometi suntune sene furlane mancul scontade e mancul consolatorie.
Nol è pôc, ai ultins paradôrs de tradizion siore di un teatri di microaree, che in ducj i siei passaçs al à savût intratignî rapuarts vîfs cul propri timp, rapresentâ i umôrs e cualchi volte, in cualchi tape tant luminose, trasfigurâ la perifarie in imagjin dal mont.
Mi plâs pensâ dopo che propit intes fasis liminâls, intes faiis sospindudis tra il vieri e il gnûf, intes snodaduris di passaç, a sedin in incubazion lis energjiis plui interessantis e sorprendentis. Saraial cussì? Il dibatiment al è viert.
di Angela Felice
(studiose di leterature e teatri, diretore dal Centro studi “Pier Paolo Pasolini” di Cjasarse, za diretore dal Teatro Club Udine)
