Dai 30 di Jugn ai 15 di Lui stâts il Friûl al à tornât a jessi il centri di chê Europe che e je impegnade inte promozion dal dirit ae lenghe e dal dirit ae diversitât, midiant de produzion artistiche e de comunicazion. Vie par chês dôs setemanis si è davuelzude la prime part de otave edizion di Suns Europe, il festival european des arts in lenghe minorizade, inmaneât de cooperative Informazione Friulana, la societât editore di Radio Onde Furlane, cu la poie finanziarie de Regjon Autonome Friûl-Vignesie Julie, de ARLeF – Agjenzie Regjonâl pe Lenghe Furlane, dal Comun di Udin, de Fondazione Friuli e cu la colaborazion dal Istitût basc Etxepare e di tancj altris sogjets publics e privâts, internazionâi e di chenti.
◆ Anticipade des proiezions li dal Visionario dal cine catalan ‘Alcarràs’, che al à vinçût l’Ors di Aur tal ultin festival di Berlin, la rassegne e à puartât ator pal Friûl une rapresentance significative de espression artistiche creative e cussiente des comunitâts di minorance de Europe. In dut a jerin undis apontaments, tra concierts e incuintris di aprofondiment e di scambi. La scree uficiâl e je stade fate in Place Libertât a Udin ai 30 di Jugn, cul conciert di Loris Vescovo, che in chê ocasion, adun cun Leo Virgili, Thomas Remondino e Massimo Silverio, al à presentât dal vîf i tocs dal so gnûf disc ‘Adalt’. Protagoniste des seradis seguitivis e je stade Alidé Sans, cjantante e polistrumentiste de Val di Aran, cjanâl pirenaic di lenghe ocitane che sul plan politic e aministratîf al fâs part de Catalogne e al sta sot dal Ream di Spagne. Vie pal incuintri fat il prin di Lui a Udin li dal Visio Garden, là che si à fevelât di musiche, lenghis, dirits, autoguvier e teritori, e intant dai doi concierts fats a Vilalte di Feagne e a Lavarian e à mostrât un nivel pardabon alt di snait e di talent, di cussience politiche e di fuarce comunicative.
◆ Cualitât musicâl, sensibilitât e ategjament positîf dai artiscj a àn segnât ancje chei altris apontaments: des esibizions a Dartigne e a Puçui, ai 8 e ai 10 di Lui, dal galês Carwyn Elllis, musicist e produtôr implicât in centancj progjets che a Suns Europe al à dât prove dal so elegant percors musicâl plui resint che al met dongje Gales e Brasîl, a chês a Sante Margarite dal Gruagn e a Plessive di Cormons, ai 7 e ai 9 di Lui, dai sarts Mauro Palmas e Frantziscu Medda, cu lis lôr contaminazions tra musiche popolâr e eletroniche, che in chê serade tal mieç dai Cuei, a mancul di cent metris dal confin cu la Slovenie, si son alternâts su la sene cu la cubie furlane-slovene formade di Franco Giordani e Davide Tomasetig.
◆ I ultins apontaments a son stâts segnâts dal confront tra Friûl e Paîs Basc, jenfri musiche, storie, scriture e atualitât, cu la presentazion, ai 13 di Lui a Udin, li de librarie Tarantola, dal libri di Jaione Dorai e Ernest Prat, “Bestaldean”, che al fevele dai esiliâts politics bascs, e cui concierts di Sara Zozaya, che a Romans dal Lusinç ai 14 e a Udin ai 15 e à inmagât il public cu la sô vôs. Inte ultime serade al è stât fat ancje il spetacul di musichis, peraulis e imagjins dedicât aes Lotis dal Cormôr, cui nostrans Franco Giordani, Simone Piva, Alvise Nodale, Nicole Coceancig, Fabrizio Citossi, Devid Strussiat, Coro La Tela, Guido Carrara e Lussia di Uanis. L’event conclusîf al jere previodût che al fos in place Libertât, ma par vie des previsions meteo si à scugnût lâ a sotet li dal teatri San Giorgio. Pecjât: dopo dal conciert di Loris Vescovo, al sarès stât biel tornâ a jemplâ il centri di chê che e varès di jessi la capitâl dal Friûl cu lis cjançons intimistis e crepuscolârs di Sara Zozaya e cu la memorie vive di une des pagjinis plui impuartantis de storie furlane dal Nûfcent.
◆ La seconde part di Suns Europe 2022 si fasarà in Novembar e il conciert finâl cui sîs grups o soliscj selezionâts daûr dal avîs internazionâl dât fûr inte Vierte stade al è in program a Udin li dal teatri “Giovani da Udine” sabide ai 26. Cundut achel, si pues fâ bielzà un prin belanç dal festival. Al è une vore positîf, cemût che al marche Carli Pup, president di Informazione Friulana, «no dome pe cualitât e pe varietât des propuestis dal program e pal bon acet che a àn vût de bande dal public presint tai diviers events, ma ancjemò une volte pe maniere di lavorâ in rêt, cui partners furlans e cun chei forescj, par fâ Suns Europe, e pe relazion disvilupade cui ospits e cui protagoniscj de rassegne, che inmò plui che intes edizions passadis nus àn palesât il lôr plasê di jessi stâts in Friûl e di vê cognossût la nestre realtât, e che a spartiran cu la lôr int e intes lôr comunitâts chest plasê e cheste cognossince», par lâ dilunc a lavorâ in rêt a pro dal dirit ae lenghe e dal dirit ae diversitât. ❚
