Storie platade: tal gurizan biadelore si fevele dai furlans muarts sot dal esercit austroongjarês te Grande Vuere

Cent agns fa a son stâts doi furlans, il cogo dal esercit austriac Eugenio Sandrigo e l’alpin Riccardo Giusto, i prins muarts te “inutile stragje” che e je sclopade fra Italie e Austrie pal control di chestis tieris di confin e che e à viodût oms de stesse tiere frontâsi vistint monturis di colôr diviers.
Di chei militârs di lenghe furlane, todescje, slovene e venite, oms cu la monture austroongjarese, si son pierdudis lis olmis, dismenteâts de storie uficiâl e considerâts “austriacants e nemîs”. La storie di fat e ricuarde che il Friûl austriac al è jentrât in vuere ai 28 di Lui dal 1914, ma no si fevele mai dal fat che dal Friûl, o miôr de Contee di Gurize e Gardiscje, a son partîts pe vuere tes filis dal Imperi Austroongjarês 30mil oms: un diesim di chescj a son muarts, altris a son stâts internâts o fats presonîrs tai cjamps ator pe Italie o in Russie. Lis cronichis a contin che tal Istât dal 1915, a son stâts plui o mancul 70mil i civîi depuartâts dal Friûl Orientâl, fra di lôr a jerin plevans, mestris, sindics e impleâts, cu la acuse di vê simpatiis “austriacantis”.
Graciis aes ricercjis di storics e studiôs furlans, al è stât pussibil identificâ une vore dai nestris muarts, gjavantju di chê dismentie costruide dal fat che a muririn cuntune monture divierse di chê taliane. Biadelore duncje che pes celebrazions dal Centenari de Grande Vuere, i Comuns dai teritoris apartignûts ae contee di Gurize, insiemi a diviersis associazions culturâls, a àn uficialmentri podût ricuardâ chescj muarts che a combaterin cul esercit dal Imperadôr. Tantis a son lis cunvignis e i events organizâts par ricuardâju, ancje dome depositant une corone di orâr, realizant sculturis e lapidis in lûcs che a ricuardin lis vicendis di chescj soldats dismenteâts, fasint mostris multimediâls tant che Frammenti di memoria, 1914. La Guerra degli altri e i friulani, o la esposizion itinerante Uno stato in uniforme. Friulani e Giuliani nell’esercito austro-ungarico. O ancjemò al è stât presentât il libri Com’era equipaggiato il “nostro” esercito nel 1914? e tancj altris. Si vûl duncje recuperâ la memorie, par onorâ chescj nestris fradis muarts; a Sant Canzian e je stade fate la consegne des targhis cui nons dai tancj muarts e a Vilès al è stât fat un spetacul e leturis par ricuardâ la tragjedie dai “fassinârs” dal Istât dal 1915. ❚
Moira Pezzetta