Sperant intune riprese autunâl

La Zonte Regjonâl e à finalmentri prontât un document di politiche industriâl, pardabon penç, pensât sedi par frontâ la crisi che par rilançâ il manifaturîr. E jere propit la ore che la industrie e tornàs al centri de atenzion de politiche!
Di simpri, la CISL di Udin e veve individuât intal manifaturîr il cûr vîf e che al tire de economie locâl, ma no jere stade scoltade.
E leve di mode, di fat, la convinzion infondade e superficiâl che lis fabrichis a fossin “a pierdi” e il terziari, insiemi a chê che i disin “economie de cognossince”, al sarès stât suficient a rezi la economie e il lavôr.
Fevelâ, o miôr trabascjâ, di new economy al jere “in”, intant che interessâsi di industrie e di economie reâl al jere “out”. E, di fat, vuê si viodin i risultâts di dut chest!
Il Friûl – e lis provinciis di Udin e di Pordenon in particolâr – al à sofiert une vore par vie de disatenzion grave viers dal setôr produtîf. I numars, inte lôr obietivitât crudêl, a son li a dimostrâlu. A cressin fûr di misure i “espuls”, ven a stâi chei lavoradôrs butâts fûr dal circuit produtîf, i “conzelâts”, val a dî chei lavoradôrs che a gjoldin di amortizadôrs sociâi, e i “avilîts”, o ben chei che une ocupazion nancje plui le cirin, pûr jessint disponibii a lavorâ.
In Friûl-Vignesie Julie, intal prin trimestri dal 2014, a son stâts pierdûts altris 3.643 ocupâts, a pet dal periodi corispondent dal 2013, e cuasi 17.000 ocupâts a pet dal trimestri dal 2010!
I disocupâts a son lâts sù a cuote 47.373, cuntun aument dal 36,2% a pet dal 2010. Lis stimis furnidis plui di resint de Regjon a previodin un tas di disocupazion, inte medie anuâl dal 2014, dal 8,5% a pet dal 7,7 dal 2013. Intal prin cuadrimestri di chest an, lis jentradis in mobilitât a cressin dal +34,4%. Intal periodi Zenâr-Jugn dal 2014 la Casse Integrazion Vuadagns e cres dal 17,4% e e passe i 16 milions di oris autorizadis, cuntun aument de Casse Integrazion Speciâl dal 38%. A chest ritmi, la sume totâl di oris autorizadis intal 2014 in provincie di Udin si sestarès a 13,8 milions su base anuâl e a 32,1 milions in Friûl-VJ. Chest al corispuindarès a 8.350 lavoradôrs “conzelâts” in provincie di Udin e a 19.460 in Regjon.
Ve lis resons che par chês la CISL di Udin e stime impuartant che la Regjon e vedi butât jù un plan di intervent sul sisteme produtîf che al conten trê elements positîfs. Il prin al è la cussience che il manifaturîr al è “la” prioritât. Il secont al è che si à aprofondît, analizât, studiât il setôr e chest al puarte a une miôr e necessarie cognossince de situazion. Il tierç al è che si prefigurin rispuestis e soluzions di sisteme a une crisi che e je di sisteme. Al va dit, però, che la politiche nus à, magari cussì no, masse voltis fat sperâ cun anunzis pompôs che po dopo però no ur è vignût daûr un biel nuie. Al è propit par  chest motîf che la CISL furlane, come simpri, e valutarà intal merit lis azions dal guvier regjonâl e si doprarà par che i contignûts dal document di politiche industriâl si tradusin in proviodiments concrets.
Fasìn in mût che la riprese autunâl e sedi ancje une riprese de produzion e de ocupazion. ❚
✒ Pauli Mason, component de Segretarie de UST CISL di Udin