SPECIÂL – Une vuere cence vints ni vincidôrs

Su lis stradis ogni dì a pierdin la vite 14 personis e 619 a restin feridis, miârs di fameis, ogni an, a vain pe pierdite dai lôr cjârs e, daûr di un studi resint, il Friûl e je la seconde regjon dal Nord Italie par numar di muarts, par incident stradâl, ogni 100.000 abitants.
I dâts ripuartâts a son la prove di cemût che, in particolâr te nestre regjon, la sigurece stradâl e sedi un obietîf prioritari. Di agns incà lis associazions regjonâls e statâls di motocicliscj, midiant de presince tal nestri teritori, a Maian, de riviste Bikers Life (www.bikerslife.com), si impegnin par miorâ la sigurece di cui che al circole pes stradis regjonâls e ancje lis istituzions locâls, tai ultins mês, a son daûr a movisi par cirî une soluzion a chest probleme. In provincie di Udin l’assessôr ai Traspuarts Fabio Marchetti al à promovût il progjet «Maxi plan pe sigurece stradâl». La iniziative provinciâl, di plui di un milion di euros, e je destinade ai utents di ogni fasse di etât e al è organizât midiant di une schirie di manifestazions cuntun fuart impat sociâl. In regjon l’assessôr Riccardi e il president Tondo, oltri che lavorâ par miorâ la rêt viarie, a son daûr a promovi progjets pilote, par capî cualis che a sedin lis manifestazions plui justis pai zovins e che a sedin duncje in stât di fâ calâ il numar di incidents dai zovins e no dome. L’impegn des istituzions e des associazions privadis, però, cualchi volte nol baste. Ogni dì i gjornâi locâi a ripuartin i numars di cheste vuere cence nemîs, ni batûts, ni vincidôrs. Al è necessari che i rapresentants regjonâi, provinciâi, lis scuelis e lis associazions di categorie a colaborin in maniere ative par diminuî, tal limit dal pussibil, chest fatôr di pericul no dome pe vite ma ancje pe salût dai citadins furlans. Par creâ une colaborazion tra i ents a pene nomenâts, te Biker Fest di Osôf li dal parc dal Rivelin, ai 6 di Jugn a lis 10 e je stade organizade une Conference su la sigurece stradâl par fâ il pont de situazion e studiâ lis stradis di cjapâ tai agns che a vegnin.
Giosuè Rossi