SPECIÂL. Tony Centa. Un furlan a Cinecittà

Toni Centa al nas a Manià ai 10 di Avost dal 1907. Zovin di grinte e di morbin, viodût che nol voleve lâ a vore te feramente di famee, il pari lu mande a studiâ di perît agrari.
Tornât a cjase dal servizi militâr, li che si jere arolât alpin a 18 agns, al partìs pes Americhis dulà che al cognòs altris furlans de diaspore e li che tal 1930 al maride Elena Tramontin, une cjavassine fie dal imprenditôr edîl li che il pari lu veve mandât a lavorâ. In Americhe al cognòs un dai dirigjents de Paramount che, viodude la presince fisiche e la paronance intal fevelâ par inglês, lu invide tai Studios.
Dal ‘31 al ‘33 duncje, Centa al lavore pe Paramount jentrant di fat tal mont dal cine american; incjantât e sviât de gnove vite e dai gnûfs costums (vâl a dî atoris e lus) tal 33 si separe de femine e subit daspò al devente segretari di Primo Carnera, cognossût di pôc.
Tal ‘35 al torne in Patrie cu la idee fisse di partî pe Afriche ma biel lant a Rome par distrigâ lis pratichis pe partence, la siore Yadi Rosa Ambrosio di Manià lu ospite a cjase sô e, par vie de biele presince, lu convinç a fâ un provin pal cine.
Dilunc dal provin al è notât di Galeazzo Ciano (grant passionât di cine) che, impressionât dal zovin atôr, lu convinç a lassâ pierdi la Afriche e a presentâsi dal produtôr Roberto Dandi. Chest lu met in contat cul regjist cecoslovac Gustav Machaty che al cjape sù Centa cul rûl di protagonist tal cine Ballerine (che tal ‘36 al vignarà presentât ae Mostre dal Cine di Vignesie). Tal stes an al ven ingaiât dal regjist Augusto Genine pal cine Squadrone bianco che al vinç la Mostre dal Cine di Vignesie come miôr cine talian.
Centa al ven une cetant preseât e al zire une vore di cines li che al vistìs rûi di prime impuartance, tant di deventâ un dai protagoniscj de frescje nassude Cinecittà.
Toni Centa al recite in passe 30 cines, lavorant cui miôrs atôrs dal timp: di Gino Cervi a Fosco Giachetti, di Alida Valli a Anna Magnani, impersonant rûi di spirt ma ancje dramatics.
La leç sul monopoli dai cines forescj e puarte lis cjasis americanis (MGM, 20th Century Fox, Paramount e Warner Bros.) a sierâ lis filiâls talianis e dal prin di Zenâr dal ‘39 no vegnin plui proietâts cines americans; i atôrs nostrans a cognossin pe prime volte il fenomen dal divisim. Al è il periodi dai cines nomenâts “dei telefoni bianchi” par vie des senografiis e des tramis (di barufis) ambientadis in gran part a Budapest.
Tal ‘42 Centa al torne in Friûl e, declinant i sburts dal cine di regjim, al vîf jenfri Manià e Cortine fin ae fin de vuere.
Tornât a Rome, al devente interprit, assistent di produzion e amì personâl di Orson Welles e, intai agns ’50, ancje talent-scout e segretari di produzion.
Toni Centa al mûr ai 19 di Avrîl dal ‘79 daspò vê continuât a fâ piçulis parts e jessisi slontanât dal cine par ocupâsi di publichis relazions e di ristorazion.
Sandri Olivetto