Sfuei Mensîl Furlan Indipendent
Archivi de Patrie

SPECIÂL – Timp no ’nd e’ plui, si scuen fâ alc daurman

............

Mai come tai ultins agns e vâl la detule che e dîs che «no son plui lis miezis stagjons…». Il clime al è mudât deventant plui balarin rispiet a chel che a àn vivût i nestris vons: in dì di vuê chest si è parfin stramudât intun probleme no di pôc, stant che fenomens violents tant che ploiis, sglavins, burlaçs e diluvions a tibiin dispès ancje il nestri Friûl.
Par vê un sclariment su ce che al sta capitant e, soredut, su ce che nus tocjarà frontâ un doman, o vin sintût Alessandro Peressotti, professôr li dal Dipartiment di Siencis agrariis e ambientâls de Facoltât di Agrarie de Universitât dal Friûl.
Ce staial sucedint al clime, professôr? Vino di preocupâsi pal avignî?
Disìn prin di dut che i mudaments climatics a van daûr dal cicli energjetic de Tiere: dilunc dai milenis a son capitâts cetancj savoltaments tant che lis glaciazions o etis li che lis temperaduris a son stadis une vore altis.
Parcè sucedino tancj disastris naturâi? Al pararès che a ’ndi sedin simpri di plui…
Di fat a nivel globâl a ’ndi capitin simpri di plui: chest al sucêt par vie che la Nature no rive a discjariâ la sô energjie un pôc ae volte come che e à fat par milions di agns. Lis temperaduris plui altis che o vin cumò rispiet a chês di un secul indaûr a fasin cressi la cuantitât di energjie metude dongje di un ecosisteme, che po le libare in maniere plui concentrade e duncje violente.

Il prefessôr Peressotti
Il professôr Peressotti

La situazion che si cjatìn devant dai voi a nivel globâl in dì di vuê ise colpe dome di causis naturâls o ise discjadenade ancje dal om?
Al è un fat di veretât che tai ultins 30-40 agns il timp al è mudât: in chest periodi o vin regjistrât dâts pardabon fûr de medie, tant che i tredis agns plui cjalts dal ultin secul ju vin vûts propit jenfri i ultins vincj agns. Cun di plui, al è stât dimostrât che al esist un leam jenfri i efiets te atmosfere de incressite dai gas sere, che a àn tocjât une percentuâl mai stade cussì alte, e il numar di events naturâi di une cierte violence. Par chest, al sarès facil dî che il probleme al nas des ativitâts dal om ma dut câs e mancje la ciertece sientifiche par fâ buine cheste afermazion.
No ise cheste la scuse che diviers politics, ma ancje sienziâts, a tirin fûr par no movi un dêt a pro dal ambient?
No mi sint di criticâ dal dut chescj coleghis «negazioniscj», ancje se magari a fevelin lant daûr di cualchi interès ben precîs, par vie che juste apont e mancje la conferme uficiâl di bande de sience. Dut câs però timp no ’nd è plui: ancje se in chest moment o finissin di produsi anidride carboniche, pai prossims cincuante agns la temperadure de Tiere e incressarès distès, e par vê un efiet contrari o varessin di spietâ almancul un secul. Se si vûl fâ ancje un discors economic, no olsi imagjinâ ce conseguencis che e varès la disparide des rasulis di Lignan e di Grau par vie de incressite dal nivel dal mâr… Intant lis Maldivis a finiran sot de aghe dentri dal 2080.
Isal alc che si pues fâ daurman?
Tal gno dipartiment li de Universitât dal Friûl o stin daûr a trê progjets par judâ l’ambient. Prin di dut, o tignìn sot voli il respîr di un ecosisteme midiant imprescj di pueste par misurâ la anidride carboniche: i sîts che o stin studiant a son a Bean, in Slovenie sul Cjars dongje Kozina e a Muçane, li che o vin un bosc di rôi. Se vie pal Istât al è cjaldon, un ecosisteme al piert une vore di carboni e al riscje di deventâ sterp. Po o stin lavorant pe mitigazion dal clime.
Ven a stâi?
Si trate di tirâ fûr anidride carboniche de atmosfere e di ingrumâle tai arbui e tal humus: o crodìn che cheste e sei une buine maniere par gjavâ incuinament dal aiar. Fasint cussì, si pues fâ acolt naturâl siôr di carboni: par esempli, l’an passât lu vin doprât suntun cjamp di blave e o vin vût il 20 par cent di racuelte in plui! Un altri nestri obietîf al è chel di produsi chel che o vin clamât «biocjarbon», une sorte di carbonele otignude midiant biomassis, e po vendilu tai marcjâts locâi.
Alessio Potocco

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +