SPECIÂL. Su la memorie di Tellini al è stât costruît un Istitût di Culture

Bielzà un secul indaûr un siôr di non Achille Tellini si metè tal cjâf di tirâ sù contis e vilotis pardut il Friûl, e po dopo ancje di publicâ chestis racueltis. Lu fasè tal interès di no pierdi la lenghe e il patrimoni culturâl leât a di chê, e che midiant des contis al vignive puartât indevant gjenerazion dopo gjenerazion. Un lavôr migo di pôc, se si pense che al veve mantignudis ancje lis variantis locâls de lenghe, daûr dai paîs li che lis veve scoltadis.
Une opare colossâl e impuartante, e si à di dâi grant mert a lui se tal Friûl di vuê si impensisi ancjemò di ce che al jere il Friûl di une volte.
Un secul dopo però, al è biel viodi che il lavôr, l’impegn e lis ideis di Tellini no son ladis pierdudis, inacuarzisi che che al jere un om une vore moderni e indevant rispiet ai timps che al viveve, e che al sarès cetant atuâl ancje in dì di vuê.
E propit par tignî vivis lis sôs ideis e lis sôs oparis, sul finî dal secul passât un grup di inteletuâi furlans e di operadôrs culturâi di une cierte puartade si son dâts dongje par lâ indenant a fâ culture, daûr des liniis di Tellini.
Al nassè cussì tal 1992, cun sede tal paîs di Manzan, un Istitût di Culture che al cjape il non propit di “Achille Tellini”, e jenfri il grup dai fondadôrs si cjatin nons tant che Pre Meni Zanier, Galliano Zof, Maurizio Puntin, Max De Pelca, e ancje tancj altris. Une associazion-istitût nassude propit cu la intenzion di puartâ indevant un lavôr di racuelte dal patrimoni culturâl e di ricognossiment linguistic che dopo di Tellini si jere un pôc pierdût pe strade.
Il lavôr plui impuartant che l’Istitût Tellini in dì di vuê al è daûr a puartâ indevant al è chel de golaine di libris “Mîts, Flabis e Liendis dal Friûl storic”, che ae fin de produzion e sarà une des oparis plui impuartantis fatis in Friûl: une racuelte di ben 18 volums, dulà che i prins 8 a son za stâts publicâts. Cheste vore, in pocjis peraulis, e je une racuelte di contis tiradis sù in ducj i paîs dal Friûl, scoltant i vielis e regjistrant lis lôr memoriis prime che a ledin pierdudis, parant vie cussì il pericul che daûr di lôr e vegnin canceladis lis pagjinis de storie popolâr e tradizionâl dal Friûl.
Ma chest Istitût no si impegne dome te scriture des contis, al sta fasint lavôrs ancje in altris cjamps di stamp culturâl: al baste pensâ che si divît in vot dipartiments di ativitât e che in plui de antropologjie culturâl si da di fâ intal cjamp de pedagogjie, de toponomastiche, de linguistiche, de leterature, de musicologjie, de storie e des arts figurativis e visivis.
Une ativitât che si slargje pardut, propit come che a jerin i interès di Achille Tellini che, se di indulà che al è al podès viodi ce che a fasin par di ca cul so non, dal sigûr al sarès content.
Luca Zoratti