SPECIÂL – Marama Toyo, l’istrian che al amave il speedway

Adolfo Marama Toyo: un marinâr da la Istrie, par metât egjizian ma, soredut, il prin a puartâ in Italie il speedway, vâl a dî garis di motocicletis su pistis ovâls in tiere batude e cun derapadis e sbandadis par superâ lis curvis. Daspò la presonie in Australie, Adolfo al veve organizât e partecipât aes primis garis al stadi Moretti di Udin. Ancjemò cumò, il speedway al è une dissipline une vore praticade intai paîs anglosassons (Americhe su ducj) e te Europe dal Est.
CENCE FRENS_ Lis motos dopradis a son une vore particolârs: motôrs di 500 cc a 4 timps supercuadri, cun astis e belancîrs cun lubrificazion a pierdite di vueli. Il combustibil al è l’alcul metilic.
No àn cambi e amortizatôrs par daûr, e a pesin ancje dome 77 chilos. No àn frens, tant che lis curvis a son di fâ in derapade cui pîts par tiere. Tes garis, i pilotis (di solit 16) a son dividûts in grups di cuatri a rotazion, par disfidâsi l’un cun l’altri. Il prin al cjape trê ponts, chei altris doi, un e zero. Ae fin, al vinç il pilote cun plui ponts. Lis pistis ovâls a son lungjis di 340 a 420 metris, e a son di glerie, di claps o di granît. Si pues cori ancje su la glace, e chê specialitât e à non ice-speedway: lis gomis a àn clauts par grampâ te maniere juste. Une note finâl sul public: dispès lis garis lis viodin lis fameis, che a puartin i fruts tal viert par fâ un ghriringhel in dute trancuilitât.
Davide Francescutti