SPECIÂL – Mancul cuantitât e plui cualitât: o vin di deventâ piçui esploradôrs!

Si à notât tai ultins agns un aument de domande di cualitât, massime intal setôr enogastronomic. Ce cirino lis personis?
La cressite de cualitât e nas di une cussience plui alte dal consumadôr. La culture enogastronomiche e je rivade a jentrâ in tancj stîi di vite e tes abitudins alimentârs che a jerin rivadis tal daspovuere. Mi riferìs ae corse ai prodots dal supermarcjât, pronts par jessi consumâts e espression di un superament de vecje culture contadine. Il boom economic al à puartât vie tradizions vecjis, creant feminis che no volevin e no savevin cusinâ. Lis campagnis di informazion sui prodots sans, e magari di cjase nestre, a àn puartât a un cambi di direzion, ancje par vie dai scandui sul lat e su lis «mozarelis cinesis». Vuê il consumadôr al cîr la cualitât e le pretint dai prodots locâi.
Cemût vegnial premiât il produtôr o la aziende che e investìs in cualitât?
Par sorevivi e je dure. I artesans dal gust dispès no rivin a puartâ i prodots fûr dal teritori comunâl e massime no disponin des risorsis economichis justis pe comunicazion. In cheste filiere di cognossince, gjornâi, radio, internet e TV a son fondamentâi par segnalâ lis veris ecelencis. Po dopo, il marcjât al è il judiç assolût e al premie simpri la cualitât che no simpri e rispuint ae cuantitât.
Tantis informazions nus rivin dai media: cemût cjatâ la cualitât?
Cheste je la domande plui pertinente e plui dificile. Jo o soi convint che ognidun di nô al à di deventâ un piçul esploradôr. Nol è un sisteme par selezionâ la comunicazion che e agjìs in buine fede. Se o imparìn a scuvierzi prime di dut il patrimoni de nestre regjon, o sarìn za a bon pont. E indenant cul turisim enogastronomic!
Cemût un editôr cirial la cualitât in chel che al publiche, evitant falsis atrazions?
L’ecuilibri precari tra etiche professionâl e introits publicitaris al cree no pocjis dificoltâts. Jo personalmentri o ai fate le sielte di rivolzimi al marcjât locâl che o cognòs e che o pues controlâ di persone e contâlu in maniere oneste. Dut chest, fasint un gjornalisim di frontiere che nol interesse i grancj editôrs. E je soredut passion, e dome daspò un business: dome il podê condividi un progjet cun ducj i colaboradôrs al permet la sorevivence, decretade simpri dal marcjât. Il gno gjornâl al ven fûr in edicule di siet agns in ca, a 2,50 euro. Il fat che a sedin siet agns che i letôrs a van indenant a comprâlu e che ogni an si zonti cualchidun, al è risultât di un bon lavôr. No otim, ma bon!
Mara Piccoli