SPECIÂL – I sîts de rêt

I pionîrs intai agns Novante
E jere la seconde metât dai agns Novante cuant che il furlan al à scomençât a sgripiâ inte rêt. I prins esperiments di sîts statics in lenghe furlane a son stâts chei de Academie dal Friûl, di Onde Furlane e de Patrie dal Friûl. A son passâts plui di 10 agns di chei prins esperiments. Vuê cuale ise la situazion?
I sîts di informazion
In gjenerâl, il furlan inte rêt al à cjatât un so spazi e une sô dimension. In particolâr, o vin une buine schirie di sîts di informazion gjornalistiche. Il plui seguît al è cun buine probabilitât lenghe.net (www.lenghe.net) che – cu la sô struture bilengâl e cun inzornaments avonde periodics e regolârs – al è deventât un pont di riferiment svelt pes notiziis dal Friûl, in particolâr su la cuistion de tutele de lenghe. Un altri sît storic e une vore curât dal pont di viste grafic, al è chel di Onde Furlane (www.friul.it). Dut câs, la mancjance di une politiche di inzornaments regolârs e rint un pôc dificile la fruizion pai letôrs. Di segnalâ la pussibilitât di scoltâ la radio in streaming, ancje se l’utent al  varès bisugne di cualchi informazion tecniche in plui. Un altri sît di informazion su la rêt al è friul.net (www.friul.net), inzornât avonde dispès cun notiziis curtis e cence fotografiis. A son po dopo i sîts di informazion che a fasin di supuart a publicazions su cjarte: Il Diari (www.ildiari.eu), Ladins dal Friûl (www.ladinsdalfriul.eu) e infin chel de Patrie dal Friûl (www.lapatriedalfriul.org).
I sîts des associazions
Une altre categorie di sîts par furlan e je chê des realtâts associativis e culturâls. O vin par esempli i sîts dal Istitût Ladin Furlan pre Checo Placerean www.istitutladinfurlan.it), dai Colonos (www.colonos.it), de La Grame (www.grame.it), dal Tomât di Buie (www.eltomat.it). Une segnalazion particolâr al merte il sît di Glesie Furlane (www.glesiefurlane.org) pe ricjece dai materiâi publicâts in rêt, tant che, par esempli, il Messalin Festîf o l’archivi complet des Olmis di pre Toni Beline. Al merte ricuardât ancje il sît dal Comitât 482 (www.com482.org), simpri pe bondance di materiâi che a documentin la sô ativitât. Une vore curâts dal pont di viste grafic a son i sîts de Societât Sientifiche e Tecnologjiche Furlane (www.siencis-par-furlan.net) e de Societât Filologjiche Furlane (www.filologicafriulana.it). Il sît dal Centri Friûl Lenghe 2000 (www.cfl2000.net) al è impuartant soredut pe pussibilitât di consultazion in linie dai dizionaris e dal coretôr ortografic.
I sîts istituzionâi
Ancje intai sîts istituzionâi l’ûs de lenghe furlane al è daûr a slargjâsi. Bilengâi o parzialmentri bilengâi a son i sîts dai comuns di Tavagnà, Udin, Rivignan, Bicinins, Montenars, Cividât, Cosean, i sîts des provinciis di Udin e di Gurize, il sît de Regjon, dal Consorzi Universitari Furlan e ancje di altris ents publics. Dut câs, in gjenerâl, il limit di chescj sîts al è chel di vê la version furlane no simpri inzornade cu la stesse frecuence di chê taliane. Pe cure de version furlane a van ricuardâts invezit i sîts de ARLeF (www.arlef.it), dal CIRF (www.uniud.it/cirf/) e dal Osmer (www.osmer.fvg.it).
I sîts personâi
Ancje intai sîts di singulis personis il furlan al à aromai une sô difusion. O ricuardìn in particolâr il sît di Giorgio Cadorini (www1.cuni.cz/~cadorini/furlan/), di Robert Pontisso (www.geocities.com/rpontisso/) e natisone.it (www.natisone.it).
I sîts di comunicazion comerciâl
Si trate di sîts dulà che il furlan al è doprât tant che mieç par une comunicazion ancje di caratar comerciâl. No son tancj, ma alc al scomence a movisi ancje chi. O fasìn trê esemplis: il sît de Serling (www.serling.org), la cooperative che e furnìs servizis linguistics pe lenghe furlane, www.italpro.net un studi di servizis informatics di Manià e il sît dal ristorant Dogana Vecchia di Trivignan (www.doganavecchia.it).
Duncje, si pues dî che la semence sparniçade tal setôr tai agns Novante e à butât avonde ben, e sperìn anzit che e butarà ancjemò di plui intai prossims agns.
Matteo Fogale