SPECIÂL. Cirf: il sburt furlan

In chest moment di crisi, di tais, di protestis e di dibatits su lis riformis che a podaressin cjapâ dentri lis universitâts talianis, nus someave just concentrâ la atenzion sul Cirf, il Centri Interdipartimentâl pe Ricercje su la culture e la lenghe dal Friûl, che massime sui fonts assegnâts des leçs regjonâls, nazionâls e comunitariis, al base la sô operativitât e la sô esistence.
PARDABON INTERDIPARTIMENTÂL_ Al fo fondât tal 1995, in gracie dal interès di cuatri dipartiments: chel di Economie, Societât e Teritori, chel di Lenghis e Leteraturis Gjermanichis e Romanzis, chel di Siencis Storichis e Documentariis e chel di Storie e Tutele dai Bens Culturâi. Cheste struture, pardabon interdipartimentâl, e à tant che obietîf chel di fâ di colegament fra docents e ricercjadôrs de Universitât dal Friûl – ma no dome –, interessâts al disvilup des ricercjis su la culture e la lenghe furlanis. Intai prins agns de costituzion, il Cirf al è rivât adore dome a inmaneâ cualchi ativitât, massime di consulence par diferentis istituzions, ma dal 2000 al è stât indotât, in gracie dal Consorzi Universitari dal Friûl, dai mieçs materiâi e des risorsis umanis che a coventin pe sô operativitât. «Par dî il vêr – nus conte Linda Picco, assegniste di ricercje dal Cirf –, no vin un organic stabilizât: infûr de segretarie, il Cirf si base su figuris che a restin precariis par vie che no son i fonts che a coventin par podêlis assumi».
Dut câs, cundut che nol dedi une gruesse sperance di “fâ cariere”, fin a vuê a àn aderît al Cirf plui di une trentine di studiôs che i àn permetût al Centri di cressi e di lâ indevant inte sô mission.
FINALMENTRI LA SEDE_ Cumò al dispon di une moderne sede tal cûr de zone universitarie, cuntun spazi par seminaris, un nucli bibliografic e cuatri stazions di lavôr. «Diviersis a son lis finalitâts dal Cirf, che al cjape spont in maniere direte dal articul 1 dal Statût di Autonomie de Universitât di Udin. Ma come prin obietîf al à propit chel di promovi, di davuelzi e di coordenâ ativitâts di ricercje pal studi de lenghe, de storie, de culture, de societât, de economie e de art dal Friûl e des comunitâts di origjin furlane tal forest. Massime, tra lis sôs motivazions, e je la volontât di meti in vore lis iniziativis pal disvilup de culture e de lenghe dal Friûl, previodudis a norme di leç». Il Cirf duncje al smire a deventâ un element di riferiment sientific par une largje zone alpine leade di carateristichis culturâls e linguistichis comuns o similis. Pecjât che nol è dut aur chel che al slûs: «ancje il Cirf al patìs pal fat che i fonts di destinâ a chestis ativitâts a son simpri di mancul: i progjets a saressin tancj ma puartâju indenant cence bêçs al è une vore dificil».
Tiziano Gualtieri