SPECIÂL – Achil Telin: pai talians une spie

Fi di Giovanni Battista Tellini e di Vittoria Pasini Vianello, destinât dal pari ai studis, si laureà une vore zovin a Turin. Al insegnà inte Regia Università La Sapienza di Rome e tal Regio Istituto Tecnico ‘A. Zanon’ di Udin. In plui dai studis gjeologjics, speleologjics, paleontologjics, gjeografics e naturalistics – in gran part dedicâts al Friûl – si impegnà te linguistiche, te glotologjie e te etnografie. Al è stât autôr di cetantis publicazions, dispès publicadis in propri. Dopo trasferît a Bologne, al fo tignût di voli de polizie almancul fin al 1915.
LA ACUSE DI SPIONAÇ_ Tal 1916 al fo acusât di jessi une spie a pro de Austrie, par vie di une letare circolâr che al veve mandade ai plevans e ai segretaris comunâi dal Friûl par cjapâ sù informazions sul ûs corint dal furlan e par meti adun un ‘Lunari daj furlans’. Si moverin lis Prefeturis di Udin e di Bologne, e Tellini al fo incuisît e denunciât al Tribunâl di Vuere. Lu someterin duncje a controi strents e la sô opare e fo censurade, ma nol bandonà mai nissun dai siei interès, des sôs passions, dai siei studis. Tal Novembar dal 1917, al scriveve a pre Giacomo Bianchini che, pai siei ideâi, vâl a dî  la furlanetât, la unitât e la nazion ladine – pensade tant che ‘un paîs privilegjiât propit tal mieç da la Europe, anzit il vêr parc internazionâl di cheste part dal mont’–, al jere disponût a patî ‘la indiference, la derision e … piês’.
ESPERANTIST_ Al cjapà part fin dai prins dal ‘900 al moviment esperantist, parcè che une lenghe universâl e varès garantide la pâs, prudelât i scambis culturâi, il turisim e il cumierç. Pai ladins furlans al pensà une grafie particolâr, mediade dal esperant (la sô prime oparute in chê grafie, publicade tal 1903, al pâr che e sedi lade pierdude). Sergio Salvi, tal libri ‘Le lingue tagliate’ (Milan, 1975) al sclarìs che la schirie di opuscui da ‘La Patrje Ladine’ (1921) e jessì imprin tant che suplement a ‘L’Esperanto’, periodic de Catidre Taliane di Esperant, che lui al veve fondade a Bologne e che al veve direzude par tancj agns. Al fo scritôr e cjaminadôr che no si stracave: al studiave il teritori e al puartave lis sôs ideis fintremai tai paisuts.
Lidia Testoni
gnece di Giobatta e di Achil Telin