Sfuei Mensîl Furlan Indipendent
Archivi de Patrie

Un altri sucès sportîf pe Slovenie

Luciano Lister

In chestis setemanis la Slovenie e à inmò une volte tornât a fâ fevelâ di se pal sucès di un sô sportîf. Il ciclist Tadej Pogacˇar, che al à fat 22 agns di pôc, al à vinçût il Tour de France, ribaltant i pronostics che a anunziavin la vitorie di un altri sloven, Primož Roglič, rivât secont. Il risultât al è dal sigûr une vore impuartant par Pogacˇar, ma ancje par dute la Slovenie, che cun nancje 30 agns fats tant che Stât indipendent e plui o mancul doi milions di abitants e va indenant a fâ fevelâ di se tal mont dal sport.
◆ Andrej Hauptman, che tal 2001 al veve vinçût un bronç ai mondiâi di ciclisim e che al à scuviert il talent di Pogacˇar cu la biciclete, al à spiegât che in Slovenie fâ sport al è tignût in bon concet, tant che alc che al fâs ben al spirt e al cjâf. Al è clâr che al à ancje une funzion educative, parcè che i fruts a scuegnin seguî un program, daûr oraris e alenament. Chest model culturâl al travane istituzions e sisteme scolastic.
◆ Cussì, di slovens si fevele ancje tal mont de bale tal zei, cun chê che Luka Dončič, che al à bielzà vinçût cetant cu la scuadre spagnole dal Real Madrid, dal 2018 al zuie cui Dallas Mavericks. Cetant cognossût tal mont de bale tal zei al è ancje Goran Dragič, che al zuie te scuare dai Heat. Tal 2017 Doncˇicˇ e Dragicˇ a àn puartât la scuare di basket de Slovenie a vinci il titul european.
◆ Ancje te bale a svol la Slovenie e à vinçût un arint ai europeans masculins dal 2019, come bielzà tal 2015. Te bale a man, invezit, la Slovenie e à vinçût un bronç ai mondiâi dal 2017.
◆ Ultimementri si sint fevelâ de Slovenie ancje tal mont dal balon, cul zuiadôr in serie A Josip Ilicˇicˇ e cul portîr Jan Oblak, stimât tant che un dai plui fuarts dal mont, daûr Samir Handanovič.
◆ Cetant ce dî al è, clarementri, ancje te suaze dai sports invernâi, tal schi di rive jù cun Tina Maze, Ilka Štuhec o Žan Kranjec, cun Peter Prevc tal salt cui schîs o cun Anamarija Lampicˇ tal schi di fonts. Tal Hockey, Anže Kopitar al zuie cui Los Angeles Kings.
◆ Ancje tal motocross, a 24 agns Tim Gajser al è campion mondiâl, intant che Janja Garnbret, di 21 agns, e à bielzà vinçût a nivel mondiâl te rimpinade boulder. Probabilmentri e sarà ai zûcs olimpics di Tokyo, come ancje Vasilij Žbogar, che al vinçût plui medaiis olimpichis (dôs di arint, a Pechin tal 2008 e a Rio de Janeiro tal 2016, e une di bronç a Atene tal 2004). Ancje Kristjan Čeh, che al à 21 agns, al pues smicjâ lontan, dopo dal cuint risultât di chest an a nivel mondiâl tal tîr dal disc. Bielzà Primož Kozmus, slançant il martiel, tal 2008 al à vinçût lis olimpiadis e tal 2009 i mondiâi. ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +