Sfuei Mensîl Furlan Indipendent
Archivi de Patrie

SLOVENIE. Sul ôr de insolvence: la dificile situazion dal belanç sloven

............

Troika sì, troika no: al è chest il dubi che al afliç la Slovenie e chei altris membris de Union Europeane. I vertiçs Ue, di fat – dopo Grecie, Irlande, Portugal, Spagne e Cipri – a podaressin cjatâsi devant di un altri câs di paîs ”insolvent”, di salvâ dal crac. Ae Slovenie i restin dome pocjis setemanis par convinci la Comission Europeane di jessi in stât di saltâ fûr de crisi cence aiûts esternis. Di fat, l’esecutîf Ue al à fissât al prin di Otubar la scjadince che dentri di chê la Slovenie e à di adotâ misuris zovevulis che i permetin di eliminâ l’ecès di deficit public dentri dal 2015, ripuartantlu sot dal limit dai parametris di Maastricht, fissâts al 3% dal Pil. Cun di plui, dentri dai 15 di Otubar, la Slovenie, tant che ducj chei altris paîs de Union Europeane, e varà di someti al tamês de Comission Europeane il propri belanç di prevision.
I numars intant a fevelin clâr: il debit public sloven al passarà chest an, pe prime volte, il limit dal tratât di Maastricht dal 60% dal Pil, e al podarès rivâ al 70%, cjapant in considerazion lis spesis pal risanament dal propri sisteme bancjari, une des causis principâls de crisi finanziarie slovene. A prime viste, soredut se paragonâts a chei dal stât talian – dulà che il debit public al à passât il 130% -, chescj valôrs no somein cussì preocupants, ma al va calcolât il trend negatîf: intal 2008 il debit public sloven al rivave al 22% dal Pil (8,1 miliarts di euros), cinc agns plui tart al à passât za il 60% (plui di 20 miliarts di euros), par un aument percentuâl dal 278%. Intal stes periodi, il Prodot interni sporc sloven al à patide une riduzion dal 12% cirche. Cun di plui, i dâts statistics a evidenziin un altri sbassament dal Pil intal prin semestri dal 2013. Dâts preocupants ancje par ce che al tocje la disocupazion: i cence lavôr di lunc periodi (24-35 mês) sul tacâ de crisi a jerin pôc mancul di 6.000, cumò a son cuasi dopleâts, intant che il numar totâl di disocupâts tra il Lui dal 2012 e il Lui dal 2013 al è cressût dal 9,6%.
La Slovenie salacor no si è fate cjatâ pronte a frontâ la crisi finanziarie, dal debit e dal stât sociâl. L’andament demografic al à dimostrât za prime dal principi de crisi globâl, la impussibilitât de bande dal Stât di lâ indevant a cuvierzi lis spesis necessariis par garantî ducj i dirits sociâi previodûts de leç. La Slovenie e je ancjemò ae ricercje de strade juste par rilançâ la sô economie. La politiche dal sparagn e de austeritât, domandade da vertiçs europeans, cussì come in altris paîs, no à prodot i risultâts sperâts. I citadins slovens, lâts in masse plui voltis intes stradis a protestâ cuintri i tancj tais, cuintri i rapresentants politics, la pocje trasparence intes istituzions, cuintri i grancj imprenditôrs, a àn patide la riduzion dal propri standard di vite, i dirits sociâi a son calâts e dut chest dal sigûr nol à judât nancje la economie che, almancul pal moment, no mostre nissun segn di riprese. Impresis che a sierin, debits che a cressin, la societât che si divît simpri di plui su la base dal redit e de capacitât di acuist. Considerevule la percentuâl des personis che a vivin disot dal limit di puaretât o che a riscjin la esclusion sociâl: intal 2012 e je rivade al 19,6%.
I cinc agns di crisi in Slovenie a son stâts caraterizâts ancje de instabilitât politiche. Trê i guviers che a àn provât a puartâ il paîs viers la riprese: chel vuidât di Borut Pahor, chel di Janez Janša e l’ultin di Alenka Bratušek. Cualis sono stadis lis misuris proponudis? Tai de spese publiche, riduzion des paiis publichis, riforme dal sisteme pensionistic (cul aument de etât pensionabile), riforme dal marcjât dal lavôr, aument de Ivz dal 20 al 22%, lote potenziade ae evasion fiscâl, imission sul marcjât di 15 aziendis e bancjis a partecipazion statâl (tant che Adria airways e Telekom), adozion de regule di aur fiscâl (o sedi la paritât di belanç metude tant che norme costituzionâl), introduzion di une gnove tasse sui imobii. Chescj a son dome cualchidun dai intervents adotâts intai ultins agns o che a stan par jentrâ in vore intai mês prossims. Evitade, ma dome pal moment, la misure ad hoc clamade ”tasse su la crisi”. Fondamentâl pe Slovenie e sarà però soredut la prove di risanament dal sisteme bancjari: la strade tacade e je chê dal model “bad bank”: ven a stâi, la creazion di une gnove societât che i vignaran passadis lis soferencis sui credits dal setôr. I asset “tossics”, che a rivaressin a plui di siet miliarts di euros, a varessin scugnût za jessi cedûts ae bad bank, ma la Comission europeane, preocupade de reâl sume dai credits in pericul, e à domandât un rimant dal trasferiment, almancul fin al completament dai stress test. Lis bancjis, une volte netadis, a podaressin contribuî al rilanç de economie cuntune juste politiche creditizie. Intant però si fevele za di une pussibile domande di aiût finanziari limitât al setôr bancjari, cussì come che al è stât fat pe Spagne, tant che alternative al intervent de troika.
A ben che la crisi de Slovenie e vedi origjins diviersis (crisi dal sisteme bancjari e no dal debit public), o osservìn duncje cemût che, devant des rigjiditâts imponudis de adozion de monede uniche, lis misuris adotadis de politiche – sedi di centridiestre che di centriçampe – a sedin dal dut di podê soreponi a chês adotadis in Italie. Argoment che al varès di indusi une riflession propit sul rûl, simpri mancul inovatîf e simpri plui costret a viazâ su binaris prefissâts, de politiche a nivel european. ❚
✒ Tjaša Gruden

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +