Rubriche realizade in colaborazion cu la riviste Novi Matajur di Cividât, setemanâl dai slovens de provincie di Udin (www.novimatajur.it)
Ai 8 di Fevrâr, aniversari de muart dal massim poete sloven France Prešeren, i slovens a celebrin la Zornade de culture. In cheste ocasion, di cualchi an lis organizazions di riferiment de comunitât slovene in Italie, SKGZ (Union culturâl economiche slovene) e SSO (Confederazion des organizazions slovenis), a conferissin un ricognossiment a personis, grups o associazions che a àn contribuît in maniere particolâr ae valorizazion e ae promozion de culture slovene. Chest an, un dai premis al è lât al professôr Viljem Cˇerno di Lusevare, inte Alte Val de Tor.
O vin domandât al prof. Cerno, che di simpri in provincie di Udin si impegne pe cressite de sô comunitât, cuâl che al è il significât e il valôr di chest ricognossiment.
“Mi inricjìs il cûr. O ai volût simpri che a Resie e in Valcjanâl, intes Vals de Tor, dal Cuarnap e dal Nadison, o fossin braurôs de culture e de lenghe slovene. O ai operât par che noaltris, che o vivìn inte part plui ocidentâl de aree culturâl slovene, no fossin simpri i ultins. Par chest, mi soi impegnât par che o fossin simpri plui presints sul teritori, o organizassin tantis iniziativis e o vessin intal stes timp dute la visibilitât pussibile, cundut che i Slovens de provincie di Udin no sedin stâts ricognossûts par tant timp e a ben che la peraule slovene e sedi stade dispreseade, e cun jê ancje ducj chei che a àn afermât cun decision che i nestris dialets a son slovens.”
La contrarietât par dut ce che al jere sloven e jere tant fuarte. Ma cu la leç di tutele, la presince de comunitât slovene in Friûl e je stade ricognossude infin uficialmentri.
“La strade e je stade lungje, ancje se a son stâts continuis, piçui pas indenant. Intal secont dopovuere in Bencˇija al jere atîf il Front democratic dai slovens, che a fasevin part ancje Izidor Predan, Mario Kont e Vojmir Tedoldi, il fondadôr e prin diretôr dal Mataiûr. Ma la sede de organizazion di Sant Pieri dai sclavons e je stade brusade. Là di nô a son stâts tant atîfs i nazionaliscj e la Gladio, e al jere duncje dificil, e cualchi volte ancje pericolôs, lotâ pe nestre lenghe. Dopo il gjornâl Mataiûr, la prime associazion slovene istituide in provincie di Udin al è stât il circul culturâl Ivan Trinko, che o soi stât jo un dai fondadôrs. In acuardi cui predis locâi, e dopo vê distribuît i volantins in dutis lis glesiis des Vals dal Nadison, o vin presentade la associazion inte tratorie di Sant Lenart. La sale e jere folcjade. In maniere seguitive a son nassudis numerosis altris associazions e ativitât, tacant dal Centri di ricercjis culturâls di Lusevare e il Circul culturâl Recˇan. O volarès in ogni câs sotlineâ che tant che slovens o jerin ducj unîts par difindi la nestre culture, no jerin divisions tra cui che al jere di çampe, i predis e altris. Ancje i predis che a lotavin pe culture slovene a vignivin di fat ofindûts e etichetâts tant che titins e traditôrs. O organizavin cors di sloven, par esempli a Masseris il doposcuele, che dilunc di chel i fruts a imparavin la lenghe e i cjants slovens. I gjenitôrs a jerin sodisfats, ma dopo a son intervignûts i gladiatôrs che, passant di cjase in cjase, a disevin che e jere une scuele jugoslave. Diviers alore a àn rinunziât. Nus à judât ancje bons. Gujon che, cu la sô machine, al puartave i fruts a lezion, cundut che i carabinîrs lu vessin vût fermât e a vessin provât a impedîjal. Par nô slovens de provincie di Udin però al à vût un significât fondamentâl la Kamenica, une manifestazion di ducj nô slovens proponude pe prime volte dal architet Valentino Simoniti. Par nô al è stât un moment politic e une grande fieste. O vin fat ancje un monument di piere cu la scrite bilengâl che e je stade plui voltis vandalizade. Tancj di nô si son cjatâts ancje cu lis gomis de machine sbusadis di clauts butâts in strade di cui che nus contrastave. Ma no cate lis contrarietâts, Kamenica e à viodût la partecipazion ancje di cinc mil personis.
Di là de ativitât socioculturâl si à di vê indiment ancje il nestri impegn politic. In variis sedis o vin puartât indevant lis nestris domandis.
Invezit, par ce che al tocje il nestri ricognossiment e la tutele, la prime propueste e je rivade intai agns Setante di Albin Škerk. Jo stes o ai presentade cheste propueste di leç a Sant Pieri dongje l’Albierc Belvedere dulà che si jerin dâts adun nô slovens ma a jerin presints ancje tancj gladiatôrs. Dome intal 2001 al è rivât però il ricognossiment uficiâl.”
Cuale ise cumò la disposizion viers la lenghe e la culture slovene?
“Al è dut tant plui trancuîl. Ca di nô, a Lusevare, ogni domenie a messe o leìn ancje cualchi test intal nestri dialet, si sintin lis cjançons slovenis, si esibissin lis corâls slovenis. In passât invezit, par esempli intes Vals dal Nadison, a son stadis prejudicadis ancje lis tratoriis là che si cjantave sloven e i post fassiscj a àn organizade une manifestazion inte dì che a Liessa, dilunc de messe, la corâl Recˇan e varès vût di cjantâ pe prime volte. Cumò al è plui rispiet pe culture e la lenghe slovene ma ancje viers de Slovenie. Tancj si rindin cont che cu la cognossince dal sloven e la colaborazion cui vicins di di là dal confin o podìn contribuî a un futûr miôr pai nestris paîs e che lis diviersis comunitâts a puedin convivi in pâs sul propri teritori cence che cualchidun al vedi di rinunziâ ae proprie culture e lenghe. Lu conferme ancje il grant interès pe scuele bilengâl, che al è l’unic mût par mantignî vîfs i nestris dialets. Nol baste fevelâju a cjase, i fruts za di cuant che a finissin trê agns a passin la plui part de zornade a scuele. Lu prove propri il dialet de Val de Tor, za indebilît a fuart.” ❚
✒ Tiaša Gruden
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +