Pai slovens tal 2020 lis feriis a son miôr a cjase lôr

Il Il leam tra il Friûl e la Slovenie al è une vore fuart ancje a nivel turistic. Cetantis voltis o vin stât in Slovenie par cjaminâ o mangjâ cui amîs.
◆ Dut câs, chest an ancje il turisim de Slovenie al à paiât lis consecuencis de pandemie di Covid-19 e des dinamichis che al à causionât, tra l’altri cun mancul turiscj dal forest. Tai ultins mês, il setôr al à vût tantis pierditis.
◆ Ancje se fasint un confront cui dâts dal an passât si reste scaturîts, di Lui la situazion e je lade miorant, massime cul jutori dai stes slovens, che a son lâts a torzeon ator pal lôr stât. Se si confrontin i numars di chest an cun chei dal 2019, daûr des statistichis a son il 176% in plui. Chest al à judât a tignî une part des pierditis.
◆ A dâ un sburt ae presince dai turiscj slovens in Slovenie a son stâts soredut i vouchers turistics dâts fûr dal guvier di Janez Janša. Cussì il setôr turistic si è un tic ripiât daspò des consecuencis de pandemie. Il ministri sloven de Economie, Zdravko Počivalšek, al à dit che, passâts doi mês dal proviodiment dal guvier, plui di 500.000 vouchers turistics a son stâts doprâts dal dut o par une part, smovint plui o mancul 70 milions di euros su 356 metûts in bande par meti in vore l’intervent.
◆ Cui che al à il voucher, al pues doprâlu fintremai ai 31 di Dicembar di chest an. Chest al vûl dî che, fin ae fin dal an, cui che al à une ativitât tal setôr turistic al pues fâ cont su plui o mancul 286 milions di euros.
◆ Par fâ un esempli, daûr i dâts uficiâi, dal inizi de stagjon turistiche fintremai ai 20 di Avost a Piran a son stâts doprâts cuasi 87.000 vouchers, par un valôr totâl di 13 milions di euros. ❚