SLOVENIE. La viertidure domenicâl dai esercizis comerciâi e rive in Parlament

E torne a fâ discuti in Slovenie la viertidure domenicâl dai esercizis comerciâi: il dibatiment al devente ancje politic cu la procedure parlamentâr inviade dal deputât indipendent Andrej Čuš che e à presentade une gnove propueste di leç sul cumierç. L’argoment al è stât za ogjet di un referendum intal 2003, cuant che il 57,5 % (la afluence e je stade però dome dal 27,54%) al veve votât pe sieradure domenicâl des buteghis (fale cualchi ecezion e cun deroghis al oblic par un massim di dîs domeniis ad an). Čuš al è convinçût che la opinion publiche e sedi ancjemò a pro de sierade domenicâl des buteghis: prove a saressin ancje lis 5 mil firmis racueltis midiant di une petizion in linie.
La gnove propueste di Čuš, ce che e sarà la base par une discussion parlamentâr, e partìs propit dal referendum e e previôt un sisteme di turnazion des viertiduris des buteghis, che a varessin di restâ sieradis la domenie e intai dîs di fieste (fale par un massim di sîs domeniis/festîfs ad an). No varessin l’oblic di sierâ lis piçulis buteghis a conduzion familiâr (cuntune superficie di vendite massime di 200 metris cuadris), i esercizis comerciâi intes stazions di servizi su lis autostradis e superstradis/tangjenziâls, lis piçulis buteghis intai centris storics e tes areis e struturis turistichis.
La discussion parlamentâr, in graciis de poie dai parlamentârs dai partîts di coalizion SMC, DeSUS e SD e dal partît di oposizion NSi, e varès di scomençâ za a Novembar e, se a rivaran a un acuardi, e podarès jessi aprovade la gnove leç dentri dai prins mês dal 2018. La plui part dai partîts e stime che e coventi in efiets regolamentât in altre maniere l’orari di viertidure des buteghis, ma che la propueste di Čuš e vedi di jessi perfezionade e che si vedi di cjatâ l’acuardi cun ducj i puartadôrs di interès, dai comerciants, ai consumadôrs e ai lavoradôrs. De stesse opinion ancje il ministeri de economie che al voleve ocupâsi des modificazions necessariis al orari di viertidure dai esercizis comerciâi e che al evidenzie inte propueste di Čuš cualchi lacune impuartante.
Ancjemò prime che l’argoment al deventàs “politic”, la cuistion, simpri cjalde, e jere tornade, soredut intai ultins mês, al centri de discussion tra il sindicât dai lavoradôrs intai esercizis comerciâi, i comerciants plui grancj e la cjamare di cumierç che a àn provât a cjatâ un compromès che al podès sodisfâ dutis lis parts. Su la base de ultime propueste dal sindicât, lis buteghis a restaressin sieradis intai dîs festîfs, intant che di domenie a podaressin jessi viertis, ma ogni dipendent al lavorarès al massim dîs domeniis ad an. E, soredut, il so lavôr al varès di jessi retribuît in maniere adeguade: in chest sens il sindicât al à proponût une retribuzion di 100 euros par domenie (cumò, daûr dai calcui dal sindicât, al rive a plui o mancul 14 euros).
Cumò i comès a son paiâts 3,5 euros sporcs ae ore e a cjapin une paie mensîl al sporc di 609 euros (442 euros nets). Dome cu lis indenitâts e lis zontis al rive a svicinâsi al compens minim previodût par leç de Slovenie (la diference e à di jessi cuvierte dal datôr di lavôr). Un altri probleme, causât de carence di personâl, a son lis oris zontadis di lavôr che no vegnin recuperadis (cualchi dipendent al rive a lavorâ ancje par 26 domeniis ad an), ma contadis tant che straordenaris che a son paiâts pôc, come che al fos lavôr studentesc. Su la base dai dâts sul 2016 di Eurocommerce e Cjamare di cumierç slovene, publicâts dal cuotidian Delo, 39 aziendis comerciâls a varessin paiât 1,375 milions di oris straordenariis. I dipendents des aziendis comerciâls intal 2016 a jerin in totâl 81.660, e di chei 51.391 comès. Il 60% al à tra i 35 e 54 agns.
✒ Tjaša Gruden