SLOVENIE. La popolazion in place cuintri dai politics in Parlament

L’AUTÔR. Une firme internazionâl prestigjose e comparìs di chest numar sul nestri gjornâl.
Franco Juri al è nassût a Cjaudistrie (Koper) in Slovenie/Jugoslavie intal 1956 di pari furlan e mari cravuate. Gjornalist e vignetist satiric, diplomatic, ex parlamentâr sloven, al colabore cun testadis slovenis e talianis. Intai Agns ’80 e ’90 si è interessât di dirits umans e al è stât deputât intal prin Parlament di Lubiane elet in maniere democratiche. Dopo la indipendence de Slovenie, intai guviers di Janez Drnovšek, al à vût incarghis impuartantis inte diplomazie dal so Paîs: ambassadôr in Spagne e a Cuba, e segretari di Stât ai Afârs forescj.
***
Al è aromai dal Dicembar dal an passât che la Slovenie – in maniere puntuâl – e va in place par protestâ cuintri lis misuris di austeritât ma soredut cuintri la caste politiche locâl. Lu à fat di gnûf ancje intal dì che il mont al celebrave la femine e la sô emancipazion, ai vot di Març, par ribati che un cambiament politic ai vertiçs dal paîs nol baste. Ancje se a vuidâ il paîs e sarà, pe prime volte intai 22 agns di indipendence, une femine: Alenka Bratušek. La contestazion e smire di fat a un cambiament dal sisteme, a une democrazie plui direte e partecipative. E mancul partitocratiche. E, clâr, a un sisteme economic che al sedi mancul brutalmentri capitalist. Ma il svolt politic rivât cul vôt di sfiducie costrutive che al à fat colâ il guvier di Janez Janša al à dut câs morestât ancje i nivei de proteste. La lavine umane dai vot di Fevrâr passâts dilunc des viis e des placis di Lubiane no si è ripetude. I passe vincj mil di un mês indaûr a son deventâts cinc mil. E ancje chel che al è definît “il Riviel” (par sloven Vstaja) al assum simpri plui l’aspiet di un happening culturâl e artistic. Par fortune. Lis primis manifestazions a jerin stadis intacadis di cualchi episodi di violence, pal plui organizât di cualchi franze de diestre estreme leade a dopli fîl al prin partît di guvier, chel “democratic sloven” di Janez Janša.
Cumò che un gnûf guvier di centri sinistre al è daûr a insediâsi, no cence problemis tra i gnûfs compagns, i insurezionaliscj a cirin motîfs plui a lunc tiermin, sfidant chel che a definissin l’oportunisim di une çampe inviscjade a fuart intes flutuazions di stîl neoliberalist e inte coruzion dai agns passâts. Insume, nuie cambiâls in blanc nancje a cui che al è rivât, cuntun rimpast di coalizion, a mandâ a cjase l’impopolâr Janez Janša. E la fantasime de antipolitiche, di un “Movimento 5 Stelle”, di un Grillo sloven, e continue a menaçâ ancje la Slovenie.
(Al va indevant sul prossim numar).
✒ Franco Juri