Sfuei Mensîl Furlan Indipendent
Archivi de Patrie

SLOVENIE. La politiche slovene si scuintre sui social network

............

Rubriche realizade in colaborazion cu la riviste Novi Matajur di Cividât, setemanâl dai slovens de provincie di Udin (www.novimatajur.it)
_______
Un ex president de Republiche, definît di çampe, poiât dal guvier sloven di centriçampe tant che candidât potenziâl ae cjarie di segretari gjenerâl de Onu, e un ex prin ministri e ministri dai forescj, rapresentant de diestre slovene, refudât dal stes guvier tant che candidât a segretari gjenerâl dal Consei di Europe. La cuistion e devente daurman un motîf di scuintri cu la enesime cuistion tra diestre e çampe che e va indevant ancje su Facebook, une des rêts sociâls dopradis plui dispès dai politics slovens. Il dibatiment Peterle – Bratušek al è sclopât dopo che la prime ministre (Pozitivna Slovenija, aree di centriçampe), prime dilunc dal congrès de diplomazie slovene e in maniere seguitive ancje sul propri profîl Facebook, inte chat mensîl cui citadins, e veve listât i motîfs che la candidature di Alojz Peterle – prin prin ministri dopo la declarazion di indipendence de Slovenie e europarlamentâr atuâl di Nova Slovenija – PPE – no podeve jessi poiade dal guvier.
La Bratušek, cemût che al veve fat za in precedence il ministri dai forescj Erjavec, si è esprimude in tiermins une vore critics su la pussibile candidature di Peterle, definintle pôc serie e inusuâl, parcè che e jere stade comunicade uficialmentri al guvier dome une dì prime de scjadince dai tiermins. Ma il motîf principâl che Alenka Bratušek si è dite contrarie a sostignî Peterle, e je la cancelazion dai regjistris di residence permanente de Republiche di plui di 25 mil citadins origjinaris des ex republichis jugoslavis, fate dopo la indipendence, cuant che ae vuide dal guvier al jere propit Peterle. I “cancelâts” a àn pierdût cualsisedi status juridic e duncje ancje cjase, lavôr, assistence sanitarie e v.i. E je stade, cheste, la plui grande violazion di masse dai dirits umans in Slovenie, cemût che e à ricognossût ancje la Cort europeane pai dirits umans di Strasburc, che e à imponût al Stât il risarciment des vitimis di cheste vicende. Impussibil duncje, secont Bratušek, sostignî la candidature di Peterle a segretari gjenerâl dal Consei di Europe, la organizazion principâl di difese dai dirits umans dal continent. Il guvier sloven, cun di plui, nol podeve no tignî cont – cussì e à declarât la prime ministre – dal fat che l’europarlamentâr di Nova Slovenija – PPE, al veve condividût i pinsîrs su la situazion in Slovenie, esprimûts dal Partît popolâr european intune risoluzion, dopo la condane par coruzion dal leader de SDS Janez Janša intal afâr “Patrie”. Une risoluzion là che la Slovenie e vignive presentade – a so dî – in mût no corispondent al vêr.
Propit chest ultime afermazion e veve sburtât Peterle a definî, ancje sul propri profîl Facebook, la mancjade poie ae sô candidature une prove di discredit e di revansisim politic intai siei confronts, dome parcè che al esprim in libertât lis propriis opinions, contrariis dispès a chês dal guvier. In difese dal europarlamentâr, di là dal so partît di apartignince, si son inschiriâts ancje esponents di SDS, e soredut il president dal PPE, il francês Joseph Daul, che al à sotlineât cemût che Peterle al sarès stât un candidât otim e che finalmentri la cjarie di segretari gjenerâl dal Consei di Europe e varès podût jessi rimetude a une personalitât di alt profîl che e ven dal “Centri o Est Europe”, o sedi de part orientâl de ex tendine di fier. Invezit, tra lis critichis principâls fatis al Guvier dai partîts di diestre slovens, e je stade soredut chê di no vê volût poiâ un candidât dome pe sô apartignince politiche, cence calcolâ che la sô eventuâl nomine a segretari gjenerâl e sarès stade un onôr pe Slovenie.
Considerazion cheste, che e varès podût jessi forsit ancje legjitime, se la diestre slovene no si fos inschiriade, propit intal stes periodi, cuintri la eventuâl candidature dal ex president Danilo Türk a segretari gjenerâl de Onu. Di dutis dôs lis bandis duncje, si predicje ben e si sgarfe mâl, e ogni cuistion e devente ocasion par alçâ la temperadure politiche intun paîs che si dimostre simpri plui dividût.  ❚
Tjaša Gruden

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +