In mancul di vincjecinc agns des primis elezions democratichis e de declarazion di indipendence, la Slovenie e à imparât in curt lis ‘miôr pratichis’ de vicine Italie: nassite continue di gnovis listis o partîts, framentazion – soredut a çampe -, personalisims, politics di rilêf cjapâts dentri in vicendis judiziariis – dispès di coruzion – e, intai ultins agns, ancje une instabilitât politiche fuarte. Dopo lis dimissions de prime ministre Alenka Bratušek – dopo de vitorie al congrès dal so partît, Pozitivna Slovenija, di Zoran Jankovicˇ -, uficializadis in parlament ai 8 di Mai, il president sloven Borut Pahor al à convocât pai 13 di Lui lis secondis elezions anticipadis inte storie de Slovenie, dopo chês dal Dicembar dal 2011.
La ultime legjislature slovene che e à operât intal periodi di crisi economiche e finanziarie massime, e je durade duncje mancul di doi agns e mieç sui cuatri di mandât, e e je stade caraterizade di doi guviers diferents – chel di centridiestre di Janez Janša e chel di centriçampe de Bratušek – e trê mandataris: di là dai doi prins ministris, ancje il sindic di Ljubljana Zoran Jankovicˇ che, dopo vê vinçût lis elezions cul partît Pozitivna Slovenija, nol à rivât a formâ un guvier. Doi dai partîts fondâts intor de consultazion eletorâl dal 2011 che a vevin otignût risultâts otims – val a dî Pozitivna Slovenija di Jankovicˇ e Državljanska, liste vuidade chê volte di Gregor Virant – a riscjin cumò, stant ai prins scandais, di no rivâ a passâ il soiâr di bariere dal 4%.
La disafezion cressinte pe politiche e la malfidence in chei che ur disin professioniscj de politiche e intes istituzions, e je testemoneade no dome des tantis manifestazions che si son corudis daûr intai ultins agns – definidis dai organizadôrs ancje riviei popolârs – ma ancje dal câl inte afluence aes elezions: plui dal 80% aes primis elezions parlamentârs intai prins agns ’90; si è sestade tra il 60 e il 65% intai ultins dîs agns, fin a rivâ ai records negatîfs intes ultimis europeanis (mancul dal 25%) e al referendum dai 8 di Jugn passâts (mancul dal 12%). Altre prove de malfidence intes vecjis composizions politichis – fale chês di diestre, tant che SDS, che a rivin a mantignî une base eletorâl avonde stabil -, i sucès efimars di partîts e moviments che si son presentâts tant che ‘gnûfs’. Chest il câs di Jankovicˇ e Virant aes parlamentârs dal 2011, o dal ex president de Cort dai Conts Šoltes aes ultimis europeanis. E i prins scandais pes prossim politichis a segnin come vincidôr probabil, o in ogni câs tra i favorîts, il gnûf partît dal jurist Miro Cerar, fondât a principi mês.
Il partît di Cerar al è ancje un dai pôcs che nol è daûr a cirî acuardis preeletorâi, ma il so leader, declarantsi estrani aes vecjis divisions politichis tra diestre e çampe che al stime sterilis e danosis pal paîs, al à dit di jessi pront a colaborâ dopo lis elezions cun ognidun che al vedi a cûr la sorte de Slovenie e che nol sedi cjapât dentri in câs di coruzion. Za rivât invezit l’acuardi eletorâl tra socialdemocratics, partît dai pensionâts e liste Solidarnost, nassude dopo dai moviments popolârs. Al stes mût, al somee za pront a diestre l’acuardi tra Nova Slovenija, SLS (popolârs) e i democratics di SDS di Janez Janša che in curt al varès di scontâ la sô condane a doi agns di reclusion, jessint stât judicât colpevul di coruzion intal cognossût affaire Patria. Interessant al sarà viodi ancje il risultât che e otignarà la prime ministre dimissionarie Alenka Bratušek che e à fondât il gnûf partît ZaAB (Aleance AB), dopo la disfate inte corse ae presidence dal propri ex partît, soredut in relazion ai risultâts che al otignarà chest ultin. Plui di chês altris voltis, l’element decisîf des prossim elezions politichis al sarà cun ogni probabilitât propit la percentuâl di chei che a àn dirit che a decidaran di lâ a votâ. Cundut che il periodi nol sedi – in chest sens – tra chei miôr, stant che la date fissade pe consultazion e je ai 13 di Lui, moment tradizionâl par feriis e vacancis. Propit par chest, la Cort costituzionâl si è cjatade a vê di decidi su la legjitimitât di convocâ elezions intal periodi estîf cuant che in tancj a podaressin viodisi dineade, a cause magari di feriis za programadis, la oportunitât di esercitâ un dai propris dirits fondamentâi. La Consulte, però, nol à rilevât problemis di incostituzionalitât su la decision dal president Pahor di convocâ lis elezions anticipadis pai 13 di Lui. ❚
Tjaša Gruden
Stin dongje ae Patrie
Redazion
La seconde edizion de manifestazion “Stin dongje ae Patrie” e rapresente un moment di incuintri e di solidarietât cul mensîl “La Patrie dal Friûl”, gjornâl scrit fûr par fûr in lenghe furlane fintremai dal lontan 1946. Inte serade, che e sarà presentade dal diretôr Walter Tomada e di Serena Fogolini, si daran la volte musiciscj, […] lei di plui +
Pirulis di musiche e di storie / Un pitôr musicâl di San Denêl tal inovâl de sô muart: Giulio Urbanis (1540 – 1613)
Alessio Screm
Stant che tal articul chi sore o ai scrit di iconografie musicâl, la pirule di storie e di musiche di chest mês si intive a celebrâ un pitôr furlan che al à dât cetant in fat musiche piturade, e di lui si celebrin chest an i cuatricent e dîs agns de sô nassite. Lui al […] lei di plui +
Il cjastelîr plui grant di simpri / Sot des pleis de tiere: ae scuvierte de origjin dal çuc di Udin
Serena Fogolini
Daûr di une liende, di un proverbi o di une conte popolâr si plate simpri une fonde di veretât Al sarà forsit par cheste reson che cualchi mês indaûr, jessude la gnove di studis sientifics che a dimostravin la artificialitât dal çuc di Udin, nissun di noaltris si è maraveât plui di tant. Dal rest, […] lei di plui +
Lenghe / A Cormons si fevele dal furlan te informazion
Dree Valcic
L’impuartance dai mieç di comunicazion par la difusion de lenghis minoritariis. Cun Emanuele Galloni, Guido Germano Pettarin, Andrea Valcic. Al à moderat Wiliam Cisilino. lei di plui +
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +