Sfuei Mensîl Furlan Indipendent
Archivi de Patrie

SLOVENIE. Il president talian Mattarella in visite uficiâl in Slovenie: un incuintri li che si à fevelât tant di minorancis. I slovens a critichin la riforme locâl dal F-VJ

............

La Slovenie e la Italie a son doi paîs che di agns tra di lôr il dialic politic al pues jessi definît viert e amichevul e li che si è fissât un alt nivel di cooperazion in diviers setôrs. La Italie e je, par esempli, al secont puest tra i compagns comerciâi forescj de Slovenie e al tierç tra i invistidôrs forescj inte Republiche di Slovenie. Il cumierç internazionâl tra Slovenie e Italie al à un volum di sîs miliarts di euros, siet se si contin ancje i servizis e il turisim. In Slovenie, i visitadôrs plui fis a son di fat propit i talians. Ma un element fuart di colegament tra Slovenie e Italie al è rapresentât de presince de minorance slovene in Italie e di chê taliane in Slovenie.
E propit lis comunitâts minoritariis e la tutele dai lôr dirits, a son stâts tra i argoments principâi frontâts dilunc dal incuintri tra i doi presidents, Borut Pahor e Sergio Mattarella, ai 22 di Avrîl a Lubiane. Inte capitâl slovene, Mattarella al à cjatât ancje il prin ministri sloven Miro Cerar e il president dal parlament Milan Brglez. La visite in Slovenie, su invît di Pahor, al è stât il cuart viaç tal forest dal president talian, dopo Berlin, Parîs e Brussel.
Lis minorancis a son stadis definidis da doi presidents une ricjece che e aumente la pluriculturalitât dai doi paîs. A son stadis frontadis dopo plui intal detai lis problematichis che a integnin la tutele linguistiche. Par ce che al tocje la minorance slovene in Italie, su indicazion dai siei rapresentants scoltâts cualchi setemane prime, il president Pahor al à fevelât cun Mattarella soredut dal Italicum e de dibisugne che e sedi garantide la rapresentance de minorance slovene in parlament. Al va sotlineât che in Slovenie, intal parlament componût di 90 deputâts, doi seçs a son risiervâts ae comunitât taliane e ongjarese. Lis elezions par chescj doi seçs si fasin in paralêl cu lis elezions politichis e i doi rapresentants des minorancis a vegnin sielzûts dai iscrits tes listis di apartignince aes dôs comunitât. Si à fevelât però ancje de gnove riforme dai ents locâi adotade il Dicembar passât dal Friûl Vignesie Julie, plui voltis criticade par cierts aspiets ancje dai rapresentants des organizazions slovenis. Il president talian al à declarât che al viodarà in curt i rapresentants de comunitât slovene in Italie, intant che Pahor al à anunziât une taule di lavôr che e varà l’obietîf di cjatâ soluzions par garantî il gjoldiment dai dirits previodûts des leçs. Leçs che – a àn declarât dilunc dal incuintri il prin ministri sloven Cerar e Mattarella – a àn bisugne di timp par jessi metudis in vore ad in plen.
Il president sloven al à domandât cun di plui a Mattarella di impegnâsi par che la Italie, come che e à za fat la Slovenie, e publichi uficialmentri la relazion de comission miste storiche e culturâl italoslovene che, risultât di un aprofondît lavôr di ricercje durât ben siet agns (dal 1993 al 2000), e analize lis relazions tra Slovenie e Italie tra i agns 1880 e 1956 e e segne il cuadri storic dai acjadiments lunc il confin orientâl (disponibile in linie ae direzion  http://www.kozina.com/premik/porita.pdf).
Tra chei altris temis frontâts des delegazions slovene e taliane, il progjet di costruzion di un rigasificadôr inte baie di Zaule a Triest (simpri contrastât de Slovenie) e la cuistion de imigrazion, ancje ae lûs de disgracie resinte intal canâl di Sicilie. La Slovenie, che e veve colaborât za cu la Italie inte operazion Mare Nostrum, e à ufiert il propri impegn, metint di gnûf a disposizion la nâf militâr Triglav. ❚
Tjaša Gruden

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +