SLOVENIE. “Doc” dal vin contestadis di là dal clap: la cuistion dal Teran fra Slovenie e Cravuazie

Dopo il vecjo contenziôs sul confin, che nol è stât risolt ancjemò, e je une gnove cuistion che e divît Slovenie e Cravuazie: il teran. Il vin prodot in maniere tradizionâl sul Cjars al è tutelât di fat in Slovenie di decenis. Dopo la jentrade inte Union europeane intal 2004, la Slovenie e à viodût di deponi la marche Dop Teran che e je jentrade cussì intal ordenament de UE, impedint di fat a altris stâts di doprâ la stesse denominazion di origjin protete. Cumò però, la Comission Europeane e vûl concedi ae Cravuazie une ecezion intal ûs de indicazion teran midiant di un at delegât. Il procès al è stât inviât ai 24 di Zenâr cundut de oposizion ferme de Slovenie. A Brussel a volaressin che l’at al jentràs in vore dentri dai 30 di Jugn. La indicazion teran e scugnarà in ogni câs jessi di dimensions minôrs a pet de scrite Hrvatska Istra (Istrie cravuate) e dutis dôs a varan di jessi stampadis intal stes cjamp visîf.
La Comission Europeane e je intervignude dopo che Slovenie e Cravuazie no vevin cjatât un acuardi bilaterâl che al sodisfàs dutis dôs. Tal Jugn 2016 al jere scjadût di fat il periodi transitori là che la Cravuazie, jentrade inte UE intal 2013, e varès podût ancjemò vendi, fin al esauriment des scortis, il propri vin za prodot in precedence cu la denominazion teran. La Cravuazie no veve mai contestât il dirit de Slovenie a tutelâ la marche teran, pûr vint dirit ancje prime di deventâ membri de UE, ma e je lade indevant a vendi il propri teran. La Slovenie e je intervignude daurman par tutelâ i propris vinicultôrs denunziant lis iregolaritâts a Brussel. La vicende e à vût però une plee inspietade, viodût che la Comission Europeane, proponint la concession di une ecezion intal ûs de denominazion, e à di fat contradit la proprie diretive dal 2013, là che e sostignive che la Slovenie e fos la uniche a podê doprâ la marche teran, concedint ae Cravuazie trê agns di timp par adeguâsi al ordenament.
Di Brussel a àn ricuardât ancje ae Slovenie – che e je pronte a ricori ancje ae Cort di justizie de UE a Lussemburc – che in precedence a son stadis concedudis za plui o mancul 80 ecezions intal ûs des denominazions (soredut ae Italie, France, Spagne, Portugal e Gjermanie). La stesse Slovenie e pues di fat doprâ lis denominazions Weisser Burgunder
e Franconie (o Franconie blu), regjistradis di France e Gjermanie.
Il ministri de agriculture sloven Dejan Židan però al sosten che chest al sedi un câs diviers e che la Comission Europeane e je daûr a creâ un precedent pericolôs. Chês altris ecezions a son stadis concedudis simpri dilunc dal procès di adesion ae UE o inte fase di depositazion de marche. Cumò i vins tutelâts inte UE a son 1750: secont Židan, la concession ae Cravuazie e je in maniere indirete un atac a dutis chestis marchis protetis.
A nivel comunitari, la Slovenie cumò e gjolt de poie soredut di Ongjarie e Italie. Propit cheste ultime e je jentrade par altri in conflit tal 2015 cu la Slovenie pal teran, che al ven prodot ancje intal Friûl-Vignesie Julie. La vicende si è risolte però e i doi paîs a son interessâts ae istituzion di une marche comune transfrontaliere.
La cuistion e je in ogni câs cetant sintude ancje a nivel locâl, soredut tra i produtôrs dal teran sul Cjars. Par difindi il “vêr teran” e je stade istituide ancje la Iniziative civiche pal rispiet de tutele dal teran che e vûl impegnâsi a plui nivei par risolvi il probleme intal unic mût che e stime juste: imponi la improibizion ai vinicultôrs cravuats di doprâ la denominazion teran. ❚
Tjaša Gruden