SLOVENIE. Debit public in calâ. Obietîf: sot dal 60% dentri dal 2022

Sanitât e pensions a saran i setôrs prioritaris di invistiment intal belanç pal 2020 e il 2021. Lu à fissât il guvier sloven, vuidât di Marjan Šarec, che intai prossims doi agns al ponte ancje a ridusi il debit public al 65% intal 2020, e al 61% intal 2021, previodint un “surplus” di cirche l’1% dal Pil e une cressite economiche – secont l’Istitût pes analisis macroeconomichis e pal disvilup – dal 3,1% intal 2020 e dal 2,8% intal 2021.
La spese publiche e rivarà a nivei record, ma e restarà intai valôrs massims consintûts fissâts za in Avrîl: 10,450 miliarts di euros intal 2020 (+290 milions a pet dal an in cors) e 10,455 miliarts intal 2021.
Il ministri des financis sloven Andrej Bertoncelj al à ametût che, par sodisfâ dutis lis domandis rivadis dai varis ministeris, ents e aministrazions, a varessin vût di cressi lis jessudis di altris 600 milions di euros, ma la sielte e je stade di lâ indenant su la strade dal consolidament des financis publichis e de riduzion dal debit, pûr metintsi tal stes timp l’obietîf di garantî il benstâ lavorant sul disvilup, su la politiche sociâl e su lis paiis.
Il guvier, che al vûl ripuartâ il debit public disot dal soiâr Maastricht dal 60% dentri dal 2022, si è impegnât ancje a meti in vore lis riformis struturâls necessariis intai setôrs pensionistic, sanitari e dal marcjât dal lavôr. Al va zontât che la Slovenie, dopo vê passade la crisi economiche e finanziarie, in chest moment e je daûr a cressi plui dal dopli de medie inte eurozone e e je il Paîs che al è daûr a ridusi in timps plui svelts il so debit public. ❚
Tjaša Gruden