Sfuei Mensîl Furlan Indipendent
Archivi de Patrie

SLOVENIE. Cemût che e funzione la citadinance in Slovenie

............

Intant che in Italie si discut de riforme de citadinance e su la oportunitât o mancul dal «ius soli temperât», viodìn ce che e previôt cheste leç in Slovenie.

In Slovenie e je in vore il «ius sanguinis», duncje i fîs a àn dirit di otignî la citadinance dai gjenitôrs cence tignî cont dal lûc di nassite: al baste che un dai doi gjenitôrs al sedi citadin sloven al moment de nassite dal frut o de frute. I fîs nassûts tal forest di gjenitôrs cun citadinance divierse, a puedin elei la citadinance slovene (la declarazion e ven fate dal gjenitôr sloven o, dopo i 18 agns, in maniere personâl) dentri dal 36m an di etât. Il ius sanguinis al vâl ancje in câs di adozion.

Ma la leç su la citadinance e previôt ancje la pussibilitât di deventâ citadins slovens cu la naturalizazion. La naturalizazion e pues jessi ordenarie o straordenarie (in câs di particolârs interès nazionâi), ma no je mai automatiche: e à di jessi domandade in maniere specifiche. La carateristiche principâl e je stâ in maniere legâl par un determinât periodi in Slovenie e duncje vê instaurât un leam particolâr cun chest Stât, jessisi integrât dal dut intal ambient ator e duncje jessi pront a acetâ la Slovenie tant che gnove Patrie e rispietâ il so ordenament juridic e costituzionâl. In ducj i câs si domande la cognossince de lenghe slovene (che e à di jessi dimostrade) e la presince di adeguadis risorsis economichis e sociâls.

Inte plui part dai câs la residence e à di durâ di almancul 10 agns (e cence interuzions intai ultins 5 agns prime dal inviament de domande di citadinance). In cualchi câs a son previodudis però des facilitazions e i interessâts a puedin otignî la naturalizazion in timps plui curts: i oms des citadinis slovenis (cun trê agns di matrimoni e almancul un an di residence interote – l’ultin prin de domande), i dissendents direts fin al cuart grât di emigrants slovens (un an di residence in Slovenie), i apatridi e i dispatriâts (5 agns di residence), chei che a àn finît in Slovenie i studis universitaris (7 agns di residence, e almancul intal ultin an cence interuzion).

A puedin domandâ la citadinance slovene ancje chei che a son nassûts in Slovenie e a àn simpri stât li, al otigniment dal 18m an di etât. Par ce che al tocje la naturalizazion dai minôrs, cheste e pues sucedi (in ogni câs su domande esplicite) intal moment che almancul un dai gjenitôrs al oten la naturalizazion. Se il minôr al à plui di 14 agns, al ven domandât ancje il so consens. A àn dirit ae citadinance slovene, su domande dal lôr tutôr legâl, tal câs che a sedin citadins slovens, ancje i vuarfins o i fruts che a son stâts gjavâts ai gjenitôrs biologjics.

Un cjapitul in bande al vâl par chei che a fasin part des comunitâts minoritariis slovenis intai paîs confinants cu la Slovenie, che a puedin domandâ la citadinance slovene pûr lant indevant a vivi di là dal confin. Par ce che al tocje la cognossince de lenghe slovene cun di plui, la cundizion si calcole valide se si è frecuentât lis scuelis cun lenghe di insegnament slovene (al baste ancje vê completât dome che il prin cicli di istruzion in lenghe slovene).

✒ Tjaša Gruden

L'Editoriâl / Risierve di valôr

Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +

Salon Internazionâl dal Libri di Turin 2023

Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +

COROT. Nus à lassâts Sergio Salvi

Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +

Glesie Furlane / Grop amîs di pre Toni. Program dai events pal 2023

1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +