Sfuei Mensîl Furlan Indipendent
Archivi de Patrie

SIUMS DI STORIE. Lis Termopilis austriachis che a deventin la Cjaurêt francese

............

La rubriche storiche e continue ma cuntune variazion: cemût saressie stade la storie dal Friûl se no fos lade come che invezit e je lade te realtât? Noaltris o provìn a rispuindi cussì…
***
Cemût che e je lade
Tal principi dal 1809, l’esercit dal Imperadôr da la Austrie, rompint il tratât di Presburg che al meteve sot de jurisdizion francese il Friûl, al ocupe la Valcjanâl par rivâ a difindi strategjichementri Vilac e Lubiane. L’intindiment dal gjeni militâr austriac al è chel di inmaneâ une rêt di fuartecis di sbarament cuintri Napoleon che al ponte a Viene. Sul çuc parsore di Malborghet, clamât Tschalawai, un vecjo fuartin di len al ven ristruturât in forme moderne e a timp di record, a scomençâ dal Invier dal 1808, come chel altri parsore Raibl. Tresinte e novante veterans, la massime part arolâts tal 52 Reziment “Arciduche Franz Carl” insiemi cu la milizie teritoriâl Landwher di Maribor, sot il comant dal cjapitani Friedrich Hensel, a cjapin l’ordin di resisti fin al ultin om. A son la plui part Cravuats, Slovens, Cecs. Par trê dîs la bataie e je grivie. Napoleon nol podarès mai superâ la straordenarie posizion strategjiche dal fuart cence la idee, incredibile e che i Austriacs no se impensavin nancje par insium, di puartâ i canons a schene di mûl su lis monts parsore dal fuart, bombardantlu dal alt. Hensel al resist. I francês a son une sdrume di lôr, plui di cuindis mil oms comandâts nuie mancul che dal vicerè Eugjeni di Beauharnais. Vê il cognon de femine di Napoleon evidentementri al judave inte cariere. Dai cutuardis ai disesiet di Mai, il maçalizi al lasse sul cjamp miârs di oms: mil e tresinte francês dome il disesiet di Mai, zornade là che il fuart al ven concuistât, daspò la muart di Hensel, di cuatri uficiâi e di tresinte e cincuante soldâts de guarnigjon. Dome cuarante a restaran vîfs. Ma cheste resistence eroiche e permetarà al Arciduche Zuan di Asburg, fradi dal Imperadôr Francesc I, di ritirâsi in dute sigurece. E di proclamâ che l’eroisim di Hensel al jere di paragonâ a chel dal spartan Leonide che, murint cui siei tresinte oms, al veve salvade dute la Grecie cuintri dai Persians.
***
Cemût che e podeve lâ
La ostarie Ressman di Malborghet e je cetant famose pai macarons di patatis cu lis ciespis. Simpri che tu sedis abituât ae ciespe, che si sa, e pues jessi traditore. La ostire ju prepare propit ben, daûr la tradizion de valade: spongje bulint butade parsore cul tocj di scuete, fumant. Il cjapitani Hensel ju cognòs une vore ben, dal moment che al à passât dut l’Invier in paîs, mentri che al supervisionave lis oparis di fortificazion dal fuart. I siei soldâts, massime i cecs, ju paravin jù cul sligoviz, tant par difindisi dal aiarat glaçât che al tire jù dal Jôf Fuart. Al è biel cjatâ un moment di pâs, la sere, cui soldâts. Si dismenteisi dal marum che ti ten lontan di cjase. E chê di Hensel e je ben lontane, stant che lui al ven nuie mancul che di Kronstadt, in Transilvanie. E, finide la cene, si tire sù un pôc di tabac, ma di chel bon, puartât come une relicuie dai teritoriâi di Maribor, là che lis fueis a deventin bielis scuris cul respîr de Ongjarie. Si cjante insieme. E si devente fradis. E magari, tra sgnaputis e biris, alc si lasse scjampâ: “Herr Kommandant! Nô o deventarìn famôs come i tresinte soldâts di Leonide, sul pas des Termopilis. O resistarìn fin al ultin om. E par chest, o alci la mê tace in vuestri onôr!”. Cussì al disè un atendent che al faseve fadie a tignîsi in pîts, par vie dal sligoviz. “E se invezit di Leonide o fasessin come Temistocles?”. Chel che al veve fevelât al restave platât tal cjanton plui scûr de taulade, sot dal trofeu di un cierf cun tant di cuars che a someavin i ramaçs di un rôl. “Puedistu spiegâti miôr, tenent?”, lu smicjà Hensel tal cidin che al jere colât parsore di dute la compagnie. “Cuant che i Persians a àn tacade la citât di Atene, no àn cjatât nissun abitant. Temistocles, il grant gjenerâl, fasint fente di jessi un traditôr, daspò vêju platâts, al à inviade dute la flote dai nemîs tal budiel di mâr de isule di Salamine, là che la plui grande armade mai metude adun si è sfracaiade sui spontons di piere”. Hensel lu cjalà intensementri, cun doi voi di glace: “Vêso studiât strategjie militâr te scuele uficiâi di Graz?”. Il zovin tenent al ridè: “No… O soi professôr di grêc antîc te Universitât di Lubiane”. Ai 14 di Mai dal 1809, la valade e jere un sflandôr di butui e di profum di rosis. Une cjalde e biele Vierte, luminose e colorade. Eugjeni di Beauharnais, dal alt dal so cjaval blanc, al tacà a starnudâ: “Merd! Va ben scombati cuintri i mucs, ma la alergjie propit no!”. Devant di lui il pic dal Tschalawai, e parsore dal pic il fuart. Tu varessis dit che al jere impussibil di concuistâ, cu lis sôs muraiis di piere, rimpinât su la mont. “A son di sigûr ducj là sù, a smicjânus, un par un. E magari nus sbelein”. Ma al gjenerâl i someave strani dut chel cidin. Parcè mo, no tacavino a trai? E cemût mai dut chel cidinôr? Dal sigûr a jerin daûr a preparâ alc di stramp che no lu convinceve propit gran. E, cun di plui, al jere un tic stiçât cun Napoleon. Simpri ator, di un jet a di chel altri, a gjoldisi il miôr de vuere. Dute strategjie e zero fadie. A lui invezit lis bataiis, lis sclopetadis, la responsabilitât dai soldâts, la ploie di Autun e il caligo di Istât. E si sa che cuant che ti monte la fote no tu rivis a pensâ cun luciditât. “No mi fidi. Par cjapâlu, chi bisugne fâ un zîr dal mont. Al à un biel contâle, Napoleon, di puartâ i canons sui pics plui alts. E dopo? Ju bombardìno dal cîl?”. Disint cussì, al cjape sù une carabine e al trai par aiar, in direzion dal fuart. Nissune reazion. Nancje une sclopetade, cussì, tant par vê la creance di rispuindi. “Nus stan coionant. Li dentri nol è propit nissun. Nissun di nissun. Si passe dongje dal riul, si jentre in Malborghet, si polse une gnot e po dopo si decît ce fâ”. Cuindis mil francês sierâts intun spazi avonde limitât, jenfri il fuart comandât di Hensel, a sud, e chel tignût dal cjapitani Hermann, a Raibl, plui a nord. Cuindis mil oms presonîrs di une valade, che no varessin mai plui podût zontâsi ae grande armade di Napoleon. Cui varessial mai vût il coraç di visâlu, Napoleon, che la vuere e jere pierdude? Che la Austrie e varès vinçût? Che dut al jere finît? Almancul a Malborghet e je simpri la ostarie Ressamn, là che a fasin di mangjâ benon. “Il plat de cjase, Madame!”, al domandà Beauharnais. Che si sa, li ciespis cuetis, se propit no tu sês usât, ti fasin un ciert efiet… “Merd!”. E jù a ridi, Hensel, cun ducj i siei tresinte e novante soldâts.
Angelo Floramo

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +