SIMPRI BOGNS. Vigji Dal Piçul, Storie di Sanzòrç di Noiâr, (cence date)

“Furlan dal puest Sanzòrç di Noiâr (uficiâl San Zorç). Al è il cjâf lûc dal teritori comunâl e des frazions: Cjarisà, Gjai, Noiâr, Ziline e Çucule. E des localitâts abitadis clamadis: Borc Julian, Planais e Zone Industriâl Ausse-Cuar.
Il teritori comunâl al ocupe la superficie di 25,90 Kmc. E la altitudin e va di zero a dîs metris sul nivel dal mâr a cunfin cun Porpêt”.
Cussì Vigji (o, se o vês miôr, Luigi Del Piccolo) al comence cheste storie de citadine de Basse furlane che za e veve viodude la lûs agns indaûr par talian. Che e partìs cuntun cjapitul introdutîf che al met in suaze il teritori che si à di fevelâ: panorame toponomastic, descrizion des glesiis, tabele dai aministradôrs (dal 1847 a vuê) e dai plevans (dal 1835 a vuê). Cussì il letôr al sa ben di ce che si fevele. Ancje se la storie no si siere al teritori di Sant Zorç, ma e met ancje in lûs i rapuarts che al à vûts dilunc dai secui cui paîs dongje e massime cun Aquilee (la associazion che e à patrocinât il studi si clame Ad Undecimum, non che al è dut un program: undis miis di dulà? e parcè?).
A son sedis cjapitui in dut, de preistorie fin aes prospetivis futuris de zone industriâl Ausse-Cuar e dal puart di Noiâr. Passe cent e cuarante pagjinis, insioradis di cuarantecinc fotografiis di epoche e completadis di une bibliografie nudride e di notis une vore utilis. Difiets? Cualchidun nol pues mancjâ: la note 203 e ripet un paragraf di p. 87; la descrizion de cuviertele si cjatile dôs voltis; cualchi frase che e çuete un tichinin. Ma il libri al è di preseâ par vie de competence che al mostre in fat de storie e des ricercjis che a coventin par scrivint. E po al à ancje il merit di meti dongje tantis informazions che magari za si cognossevin ma che a jerin sparniçadis in ca e in là: cumò chei di Sant Zorç a àn un strument di consultazion facile e imediade: i acjadiments plui impuartants des variis epochis, la cronologjie des robis sucedudis intal ultin secul e mieç, i sanzorzins che i àn dât lustri al lôr paîs, la tabele di dutis lis vitimis inte seconde vuere mondiâl e v.i. E no je robe di pôc.
Al ven di dî che al sarès biel se ogni paîs al ves la sô storie scrite su di un libri di podê leile. Massime se cheste storie e je ben fate, complete, detaiade ma cence pesantecis, come cheste chi. ❚
Laurin Zuan Nardin