SIMPRI BOGNS. Scuele mezane Zuan Francesc di Tumieç, Il Signôr e S. Pieri ator pal Friûl, Udin 2003

«Il Signôr e San Pieri a lavin ator pal Friûl, cuant ch’a rivin tune valade cjargnele, da pît di un paisut rimpinât su la cleve de mont. Alì tun cjamput, a viodin une femine che e sforcjave e i deve sot come une sassine. San Pieri, curiôs, i va dongje i domande – Ce faseiso, parone, che i dais sot cun tante lene? – I semeni râfs, tant che mi ‘int nassi un par me e un par gno marît»
Velu l’incipit de prime di chestis contis cjapadis sù de vôs vive de int. Al jere il 1978 e il ricuart dal orcolat che al veve scjassât il Friûl al jere ancjemò ben vîf. Inte scuele mezane di Tumieç a vevin vude cheste idee di une ativitât didatiche che si vierzès sul teritori, che e imparàs a scoltâ la int, lis sôs contis, lis sôs tradizions. E cussì e nassè la prime edizion di chest librut (une setantine di pagjinis) che al è une testemoneance storiche e antropologjiche e, intal stes timp, une sussidi didatic par nuie banâl. Intal 2003, in ocasion dal apontament storic dai 90 agns de scuele (sicu che e dîs inte introduzion la dirigjente scolastiche Lia Durigon), al è stât ripublicât, cuntune zonte une vore impuartante, spieli dai timps e dai cambiaments de societât e dimostrazion di maturitât culturâl e civiche.
La novitât e je la presentazion di une des contis (Coculis e cavocis) in ben cuindis lenghis: il furlan (inte grafie normalizade) e in plui dutis lis lenghis presintis inte scuele intal an scolastic di riferiment, vâl a dî: talian, todesc, inglês, francês, grêc, serp-cravuat, polac, rus, arap, ebraic, persian, thai, indian, cinês. A insiorin la publicazion tredis fotografiis ‘artistichis’, risultât de ativitât davuelte a scuele intes oris di educazion ae imagjin. Insome, un lavôr une vore articolât, ben studiât e ben realizât. Brâfs i fantats e brâfs i insegnants.
E des storiis in se, ce vino di dî? A rispietin la tradizion che e vûl un S. Pieri un pôc malmadûr e un Signôr plen di savietât. Ma ancje tant uman, fintremai cu difiets: cuant che i fâs colâ la cavoce sul cjâf di Pieri, magari al volarà ancje dimostrâ che il creât, dut il creât, al è ben fat, che di miôr no si podeve, ma insome…al è ancje un tichinin dispetôs!
LAURIN ZUAN NARDIN