SIMPRI BOGNS. Riedo Pup. Par un pêl, Udin, 1975

«Dal quarantevot, la sirocade patreotiche di Pio Nono ‘e rivà fin chi, e ancje plui in sù, fin a Glemone; che anzit chei di Glemone a’ son stâz i prins, daûr dal plevan Vuarint, a rispuindi a l’invocazion dal Pape. No jerin propit pronz, parvìe che no s’e spietavin une tâl, massime dal Pape…E ancjemò cuintri dai mucs…Ma a’ partìrin istès»
E scomence cussì la prime des trenteune contis di chest libri (135 pagjinis) che al è considerât tant che un classic de leterature furlane, de prose in particolâr. No par nuie al à vudis siet edizions. Cheste dal 1975 e je insiorade di une viertidure di pari Davide Marie Turoldo (scrite pat talian), li che il frari al mostre dute la sô nostalgjie par un Friûl che nol è plui chel di une volte.
Ma Pup al sa ben che no dut al jere aur in chê volte. I siôrs a comandavin e i puars a vevin dome di contentâsi di stâ sot. Nissune maravee, alore, se la int e cirive i mieçs par difindisi inte savietât popolâr. E cussì, a vegnin fûr chescj personaçs di Riedo, un plui gaiarin di chel altri e ducj piturâts cul pinel de ironie plui sutile, cuntun stîl elegant e eficaç. Veju i patriots che si inviin sù pal Cjanâl dal Fier par fâur cuintri ai mucs, ma il lôr capo al piert une dalmine e alore a tornin ducj indaûr. Velu Rico Macôr che al invente il compromès, par finîle cun conts e prefets e proclamâ la indipendence di Moruç. Velu Tin che al declare che se e je vere che il Signôr nol paie, e je ancje vere che nancje nol scuêt. Velu Vigji Strissul che si vise di in chê dì che al è nassût il frut, par vie che a vevin clamât il veterinari abàs e la comari adalt. Velu Agnul, lavorent a Martrent in Austrie, che si cjate – in plene vuere – cul so paron che cumò al è il nemì, e a mandin sul osti la vuere e a bevin sligoviz insiemi. Velu Quilin che al met sù dute une contabilitât par tratâ diretementri cul Signôr, cence vê bisugne dal ‘fatôr’, vâl a dî dal predi. In sumis, une schirie di ritrats che a fasin vignî fûr dute une tiere, dute une civiltât e une societât sicu che e jere za fa un mieç secul.
Ma, jenfri lis riis, si pues ancje lei une riflession une vore profonde su la cundizion dal om in cheste tiere, su lis sô contradizions, lis sôs sperancis, i siei difiets e i siei merits. In altris peraulis, si pues dî che chest libri al fâs propit il mistîr che i compet ai libris: divertî, emozionâ e fâ pensâ.
LAURIN ZUAN NARDIN