SIMPRI BOGNS. Lelo Cjanton, Friûl e di vuê e di doman, Pasian di Prât, 2007

“La quistion plui serie dal nestri doman ‘e sarà chê di mantignî une diferenzie tra i omps e i polez. Chest pinsîr nol po’ fâ ridi, cun dut che tante int a’ pensin che nancje cun dut il progrès ch’o vin o ch’o varin no si podarà dissipâ une diferenzie cussì grande. A’ son persuadûz di sêi une vore diferenz ancje dai dindiaz e des ocjs”.
La ironie di Lelo Cjanton (1922-2009) e je za dute in chest toc scrit pal Strolic dal 1965 e che al fâs di jentrade a cheste racuelte che la Filologjiche e à dât fûr tant che omaç al om (pai siei 80 agns… passâts) e al autôr.
Une sielte dai siei intervents plui di dut sul Strolic, ma ancje su altris sfueis furlans, a scomençâ dal 1949 fintremai al 2000.
Eddy Bortolussi che al à curât il volum (240 pagjinis) al à dividût il materiâl par argoments: La situazion (scrits scuasi ducj dal 1971); Mutivazions (1974): une riflession ogni mês, insiorade di un pinsîr poetic sul moment de stagjon; Pinsîrs su la lenghe (1976); Quistionutis (1972): ancje chestis une par ogni mês; Friûl di vuê e di doman (1970): une schirie di obiezions “cuintrifurlanis” che Lelo ur rispuint, pont par pont; Contis, buridis fûr massime intai agns 1949-1958, ma ancje plui resintis (la ultime e je dal 1997); Puisiis e lamps di vilotis (a scomençâ dal ’49 fin al 2000); Letaris (1961-1969); Paîs pe vite (1986-1993): di Andreis fin a Zui a son piturâts, in prose o in viers, 52 paîs (ancje frazions piçulis che nancje no si saveve il non) de Patrie (cun cualchi deviazion: Grau, Sant Canzian), intai lôr aspiets plui carateristics: il paissaç, la storie, il non dal pont di viste toponomastic, lis cjasis, lis glesiis e v. i.
Par finî, une poesie che e sclarìs il concet di Patrie par Lelo e la traduzion par furlan di une liriche di Ignazio Buttitta (poete sicilian) su la impuartance de lenghe pe vite di un popul.
E salte tai vôi la capacitât dal autôr di viodi, prime dal timp, la impuartance di argoments che a saressin vignûts in lûs dome agns plui tart: l’incuinament, l’ambient di protezi, la omologazion culturâl e, duncje, la pierdite dai valôrs de tradizion, chei che a davin la voie di vivi la vite cun intensitât. ❚
✒ Laurin Zuan Nardin