SIMPRI BOGNS. Giacomo Viola, No vin durmide une lûs. Testimonianze popolari nella Grande Guerra in Friuli, Udin, 1987

“La mê famee ‘e jere di contadins; o jerin in tanc’ fradis, o vevin stale e o fasevin ancje un pôc di formadi, di chê formadeutis picˇulis ch’a jerin chê volte a Pucˇui. O vin savût de vuere une dì ch’e jere fieste, o vignivin a cjase di messe; di un moment al altri, quanch’o sin fûr di glesie, o viodìn i manifesc’: dîs classis riclamadis a colp! Si chè lì duc’ si son metûts a vaî, duc’ a levin a lei, a lei e a disevin: ‘Al è ancje il gno omp, al è ancje gno fì!’”
Cussì e scomence la prime des vincj testemoneancis su la prime vuere mondiâl, racueltis in chel di Puçui par cure dal grop Aghe di pocˇ e dal Comitât furlan pe pâs intai agns dal Otante dal secul passât. Puçui, come che si sa, al à vût une zornade tragjiche ai 30 di Otubar dal 1917, daspò de disfate di Cjaurêt. La int e à viodût la vuere jentrâ direte dentri intes stradis dal paîs, intai bearçs, intes cjasis. Chei che a contin a jerin fruts, in chê volte, al plui adolessents, a vevin lis etâts dai zûcs o dai prins morosets. E la vuere ju à sbatocjâts cuintri une realtât fate di tristerie e di violence. Nissune retoriche patriotiche o nazionaliste, duncje, ma dome il contâ sclet e sut di oms e di feminis che chê tragjiche esperience le vevin vivude su la lôr piel. Peraulis veris e, des voltis, tremendis: ‘O voi sul barcon e propi ta chel moment o viot a copâ gno pari’ (p.28); ‘Alore chei puars soldâts, plens di fan, plens di sêt, j àn trat te schene e al è muart cussì, su la place, chest majôr ch’al voleve fâ ancjemò resistence, par fâ murî duc’ alì’ (p.79).
Peraulis cjapadis sù juste in timp: la testemone plui zovine, Concete Gambone, e jere nassude intal 1908, chê plui anziane, Anute Marduche, intal 1893 e i agns a àn chel brut vizi di cuinçânus ducj! Tant plui impuartant il lavôr di Viola che al è rivât adore a salvâ i ricuarts di chês vicendis.
In bas des pagjinis e je la traduzion taliane, domandade, des voltis, dai stes intervistâts, par vie de scjarse abitudin a lei furlan.
Interessant ancje il fat che scuasi ducj i cognons dai intervistâts a gambiin cu la traduzion: chei furlans sono sorenons? O ben saressino chei i vêrs cognons, gambiâts dome pe manie di talianotâ de burocrazie?
Di segnalâ ancje lis cutuardis fotografiis di epoche e il saç introdutîf di Lucio Fabi che al clarìs ben ce maniere che al va let chest libri: nol è un libri di storie. Al è tant di mancul. Ma ancje tant di plui! ❚
Laurin Zuan Nardin