SIMPRI BOGNS. AA.VV. Zâl par furlan. Antologjiche 2016, Spilimberc 2016

«Lûctenent, alore, isal content che al va in congjêt?» Pieri Zinori, inmò cu la divise intor, al cjalave fûr pal barcon. Dopo passe trentevot agns, al molave servizi. Per raggiunti limiti d’età al jere scrit su la cjarte rivade dal ministeri. Limiti d’età a lui, ch’al veve in cuarp plui fuarce che no tancj zovins cence medole ch’a i ziravin ator pai pîts.
Cussì e scomence la prime des storiis zalis racueltis in cheste publicazion curade dal Comun di Spilimberc che e cjape dentri lis contis premiadis o segnaladis intes edizions tierce, cuarte e cuinte dal concors Zâl par furlan. A son sedis contis (cuatri a fumuts), fatis di almancul cutuardis autôrs diferents (ancje di plui, dal moment che dôs contis a son coletivis…). Al vûl dî che il concors al à cjapât pît e che il nivel dai elaborâts al è bon. Duncje e je premiade la intuizion dai ideadôrs che a àn volût lançâ la sfide ae lenghe furlane di cimentâsi cuntun gjenar che dal sigûr nol jere inte sô tradizion. Tignint cont de dificoltât di inmaneâ une storie, contâle ben, delineâ i personaçs e risolvi la trame in cuindis mil batudis, si pues dî che i risultâts a son plui che bogns. Lis contis a son ambientadis inte atualitât (plui di une propit a Spilimberc) e a tocjin problemis dal dì di vuê tant che il trafic di droghe, i profucs clandestins, lis gnovis tecnologjiis, internet e v.i. O fasìn cognossince cun maressiai arogants, fiis che a copin il pari, feminis che a san ce maniere doprâ la Digitalis purpurea, ospits di une cjase di polse che si metin a fâ investigazions, cjistiei un pôc misteriôs e v.i. No mancjin ambientazions storichis tant che l’imperi roman (Letaris de Venantius Valerius) o il periodi dal Risorziment talian (La storia dal gno paron). A meretin segnaladis, in particolâr, lis dôs contis metudis adun dai fantats de scuele secondarie di Cosean: Une bombe in palestre e Il zâl dal bidel. I profîi biografics insom dal volum nus disin che a son ancje zovins che a àn voie di scrivi par furlan e cheste e je une buine gnove. Il letôr al pues ancje divertîsi a confrontâ lis sôs preferencis cun chês esprimudis de jurie e sielzi lis contis che lui al varès pensât di premiâ.
✒ Laurin Zuan Nardin